“Барча Рамазан барз!”
“Барча Рамазан барз!”
Мартрал 5-нний Ккуллал райондалул Культуралул къатраву ларгуна мубараксса Рамазан барз лайкьну хьунабакьаву мурадрайсса шадлугъ.
Мажлис тIитIлай Ккуллал райондалул имам МухIаммад-Маннар Бариевлул бувсуна Рамазан зурул даражалия. ДакIнин бувтуна зума дугьаврил мурад ккаши-мякьлищал архIал чурххал базурдугу гьарца лайкь бакъамуния бурувччуну бугьаву бушиву.
Диндалул аьдатрайн бувну, мажлис байбивхьуна Заннал ﷻ калам буккаврийну. Мубараксса аятру ккалаккиману ия ЧIарадиял райондалиясса хIафиз (щалва Кьуръан дакIних кIулма) МухIаммад Шафи.
Мажлис бачин бувна диндалул мажлисру сакин бувайсса «Аманат» холдинграл каялувчи Ахмад ХIасанхановлул. Клубравун бавтIцириннан ванал насихIат бувна диндалул элму мюрщинияцIа лахьлан аьркиншиву.
Хъирив вяъза-насихIат бусан увккуна Разакьов Аьли – зунтталмур округрайсса Муфтиятрал жаваблувсса вакил. Дурккучунал насихIат бувна Рамазан барз лайкьну, Идавсил ﷺ лахьхьин бувсса куццуй хьунабакьияра: зума дугьлай, хъинсса давуртту дуллай ва бунагьмуния арх хъанай, куну. КIицI лавгуна Исламраву лахъсса кьимат бивщуну бушиву цачIуншиврун, уссушиврун. ДакIнин бувтуна ва аьрщарай куннан ку Аллагьнахлуну ххирану бивкIсса инсантал Кьиямасса кьини ляличIину лахъсса даражалий бикIантIишиву, сайки идавстурал ва шагьидтурал хIайп учинсса куццуй.
ЦIумадиял райондалул имамтурал каялувчи МухIаммад Мукьушдибировлул бувсуна чак баву хъанахъишиву диндалул ца агьамсса ттарцI. Му ттарцI дагьан диртманал цала дин лекьан дуллалиссар, увкуна. ДакIнин дуртуна зума дугьайни дувайсса нанижатрал шартIругу, дугьаврил низамгу.
Лакку ва оьрус мазурдийсса Рамазан зурун хас дурсса назмурду дурккуна Ккуллал райондалул мадрасалийн дарсирайн бучIайсса душварал.
Лакрал райондалул имам МухIаммад Майрановлул кIицI лавгуна ялун нанисса никиран лайкьсса тарбия дулаврил агьамшиву ва диндалия бусласисса мажлисирттайн занан аьркиншиву, занансса каши-сант душиврухлугу Заннайн щукру бикIавугу чара бакъашиву.
Райондалул администрациялул чулуха жамят барча бувна бакIчинал кумагчи Абусупиян Аьбдуллаевлул. Райондалул имам МухIаммад-Маннар Бариевлул ванайхчIин Шамил Рамазановлун тапшур дуруна дакIний личIансса бахшиш барчаллагьрал чагъар.
Мажлисрайн бавтIминнал дянив Рамазан зуруясса суаллал викторина дурну, пишкаш дуруна дакIний личIансса бахшишру.
Мукунма, кIунтти бивчуну пишкаш дуруна кьиматсса бахшишру: велосипед, телевизор ва цамур ичIаллил къай-кьуй.
Ккуллал райондалий "Ас-салам" кказит чивчуминнал дянив кIунтти бивчуну, чIивимур ХIаж (Оьмра) бувансса путёвка пишкаш дуруна. Мугу дурххуна Хъусращиял шяраватусса Рамазанова Людмилал.
Лях-карах бюххансса чIуний мавлудру ва нашидру ккалай бия МухIаммад ГъазимухIаммадов ва Рамазан Мажидов.
Ахирданий циняв бусурманнаха, хаснува зулмулувусса Палестиннаха ва хасъсса аьралий операциялуву гьуртту хъанахъисса жулва жагьилтураха дуаьгу дурну мажлис лавкьуна.
