Идавс ﷺ хъун аврил мажлис
Идавс ﷺ хъун аврил мажлис
Октябрьданул 1-нний Гъумук хьунни МухIаммад Идавс ﷺ дунияллийн увксса мубараксса Рабиуль-авваль зурун хасъсса, Украиннал аьрщарай ватандалул ххуллий чувшиврий жанну дуллусса аьралитурал ниттихъан цIа кусса мавлуд.
Ва иширал сиптачитал ва сакиншинначитал хьунни Лакрал райондалул имам ХIабиб Баталов, райондалул бакIчи Юсуп МахIаммадов, ДР-лул Халкьуннал Мажлисрал депутат Марат Илиясов ва М. Илиясовал цIанийсса «Дараччи» фондрал хъунмур Гульшан Хасаева.
МухIаммад Идавс ﷺ дунияллийн увксса мубараксса Рабиуль-авваль зуруй, аьрщи-ххюлдануяр вирттал чIявусса лакку аьрщарай, Дагъусттаннай Ислам ппив шаврил дякюруну хьусса, Исламрал элму ппив даврил цIанихми аьлимтурал ватанну хьусса Гъази-Гъумук мажлисрайн батIаврияр хъинссагу, ххуйссагу савав цамур мадикIарача.
Ниттихъащал ва мажлисрайн бувкIун бия «Дараччи» фондрал вакилталгу. МахIачкъалалия Гъумукун къулайсса транспорт щаллу дурну дия лакрал радиолул редактор Тамара Закарьяевал.
Цалчинсса ликкаву дуруна миллатрал виричу Хан-Муртазааьлил гьайкалданучIа. Кьини дия гъилисса, ссав дия пар-пар тIий някIну. Дагъусттаннал агьулданул чувшиврул лишанну хьусса гьайкалданучIа дуаь дуллалисса ниттихъал ялтту лехлай бия барзулт – ватандалул ххуллий чувшиврий жанну дуллусса вайннал арсваврал рухIру ва кьини барзултраву дирхьусса кунмасса асар бия. Лакку билаятрай бизайсса наслу Хан-Муртазааьлил дакI ва чувшиву дусса бизаннав, духкъалаганнав лакрал чиваркIуннаву чувшиву, амма къадукканнав Лакку билаятрайн чувшиву ккаккан дуллансса кьини, хIакьину паччахIлугърал мурадру буруччаврил ххуллий хасъсса аьралий операциялий талатисса лакрал ва Дагъусттаннал чиваркI сагъну-саламатну цала ужагъирттайн зана бикIаннав тIий дуаьр-ттай бия агьали.
Мичча хъамал лавгуна Дагъусттаннай ца яла хьхьичIавамунин ккаллисса Гъумучиял Хъун-мизитравун. Шикку Лакрал райондалул имамтурал бувсуна мизитралгу, аьмну лакку билаятрай Ислам ппив шаврилгу тарихрая. Мизитраву ахттайн чакгу бувну, хъамал лавгуна Сурхай-ханнал мизитравун, Гъази-Кьаландардул Зияратрайн.
Муния махъ райондалул Магьирлугърал къатраву хьунни МухIаммад Идавс ﷺ дунияллийн увксса зурул савлугърансса мавлудрал мажлис.
Гикку ихтилатру бувуна Лакрал райондалул администрациялул бакIчинал хъиривчу Явсупи ХIамзаевлул, Дагъусттаннал муфтиятрал вакил АьлиасхIаб Разакьовлул, Лакрал райондалул имам ХIабиб Баталовлул, «Память гор» организациялул Лакрал райондалийсса отделениялул хъунама Юнус Эфендиевлул, СВО-лул цалчинсса Виричу НурмахIаммад ХIажимахIаммадовлул ниттил Сапижат Мазаевал.
ХIабиб Баталовлул буллуна райондалул бакIчинан барчаллагьрал чагъар ва пишкаш дуруна тур. Мукунма, имамнал чулухасса барчаллагьрал чагъарду буллуна Аьлишаев Муртазалин, ХIамзаев Явсупин, Къюннуев Абакардун ва ХIусманов Маликлун.
Мажлис къуртал бувуна хасъсса аьралий операциялий ватандалул ххуллий чувшиврий жанну дуллуминнал рухIирдаяту алхIам буккаврийну ва хIакьину ватандалул мурадру буруччаврил ххуллий талатими сагъ-саламатну цала ужагъирттайн зана хьуннав тIисса лабизаврийну.
