Миллатрал цашиврул лишан
Лакрал ифтIарданул мажлисрайн бавтIун бия 6000-нния ливчусса агьали
Апрель зурул цанний, дяркъусса кьини душиврухгу къабурувгун, лакрал чIявусса агьали бавтIуна Ися Идавсил цIанийсса РувхIанийсса центрданийн, МухIаммад Идавсил ﷺ цIанийсса мизитравун ифтIарданийн.
Cакиншиндарал комитетрал вакилтурал бувсмунийн бувну, ряхазарунния ливчусса инсантал бавтIун бия. Цумур залданувун лагайссия вайксса лак укун хъунмасса мизитравун бакъасса? Цуксса къаххуйри ца миллатрал инсантал, оьрмулул хъуними, жагьилми, мюрщими, къуллугъчитал, захIматчитал, динчитал, интеллигенция, дурккуми, къадурккуми, аваданми, къааваданми личIи бакъа, ккуркки лагаву?
Аьдатрайн бувну, мажлис байбивхьуна мубараксса Кьуръандалул аятирттайну. ИфтIар дачин дурну ия Азим Давыдов. БавтIцириннал хьхьичIун бувккун, ихтилатру бувна: Дагъусттаннал Муфтийнал хъиривчу АхIмад МухIаммадовлул, Лакрал райондалул имам МухIаммад Саламовлул, Гъумучиял имам Ансар Сулаймановлул, ЦIуминалийсса (Новострой) имам Мансур Хаваевлул, МахIачкъалаллал № 49 школалул директор Аьбдулкарим Айгуновлул ва цаймигу бусравсса инсантурал.
ЧIяруя бавтIцириннансса бахшишру. Лях-карах тIий бия нашидру. Рамазан зурущал лакку мазрай барча буллалисса оьрчIал видеоролик ккаккан дуруна. Медициналул клиникалул, рестораннал, ттучаннал чулухасса бахшишрал сертификатругу пишкаш дуруна кIунурду бувккун. ЧIивимур хIажлийнсса — оьмралийнсса путевкардал кIунурду бувккун, тIайлабацIу хьуна тележурналист Карина Далиевангу, Кьубатусса Шамиллунгу.
Мансур Хаваевлул барчаллагь увкуна ва ифтIар лавайсса даражалий гьаншиврул ка-кумаг бувцириннахь. ЛичIинура кIицI ларгуна, зума итадакьинсса пулав бувансса ппиринжрахсса багьа буллусса, Мариян Илиясовал цIанийсса «Дараччи» фондрал цIа. Шиккува кIицI лаган, фондрал хъунмур Гульшан Хасаевал бувсунни «Дараччилул» душваврал сахаватну ка кIидархIушиву, дартIсса арцу дачIи ифтIарданун кумагран дуллушиву, дачIи Украиннавусса иширттаву гьуртту хъанахъиминнан аьркинмур ласун дуллалишиву.
Утти ифтIарданий гьуртту хьуминнал цаппарасса пикрирду:
Самрат Горчханова:
– На уттинин дурсса лакрал циняр ифтIардай гьуртту хьуссара, ва шамилчинсса хъанай дунуккар. Шиная шинайн ванил даража гьаз хъанай бур, ялу-ялун агьалигу чIявусса батIлай бур. Шагьрулул зума-къирагърайсса, лага-бучIан къулайсса кIану бакъахьурчагу, чIявусса агьали бия. Ххари бувунна волонтёртурал дянив чIявусса оьрчIру бушаврил. Тарбиялул ца яла ххуймур кьяйдар оьрчIру ва давривух хIала буххан буваву.
Рукьижат Мусаева (Буйнакск):
– На бувсса кьини дия ва кьини, на ттула уссур-ссуннахь увкуссия, оьрмулухун хъамакъаритансса кьини хьунтIиссар, жува циняв ифтIарданийн гьарча куну. Шаппа цачIун бавтIунува бикIару, ифтIарданий дурсса дуаь личIиссар, агьалинал чIарав зумув бивхьусса ччатIул хъис барачатссар. Сант дагьну дунура, 1-мур ЦIувкIуллал шяраваллил агьлу чIявусса бивкIшивугу кIицI лаган ччива. Душру ва чиваркI хIисав бувну, чан бакъа, ца ххюцIала, ряхцIала инсан ухьунссия. Зумардугу итадаркьуну, чакругу бувну махъ, цачIунмай хьуну, ца ххуйну дуссухалугу буварду.
Саидат Кьурбанова:
– ТIайламур бусан, цалчинна на укунсса ифтIарданий гьуртту хъанахъисса. Ссурвавращал бувкIра. Хъиннихха жула диндалия кIулну бикIан, лак цаннан ца ххал хьун. Ххари бувунна лакрал имамтурал усттарну, пасихIну лакку мазрай бувсса ихтилатирттал. Инсан ххуйну ниттил мазрай гъалгъа тIутIисса чIумал, га ссая гъалгъа тIий ухьурчагу, вичIи дишин гъира бикIай. Имамтал Мансур Хаваевлул ва МухIаммад Саламовлул пасихIсса лакку мазрай бувсса ихтилат асар хьунни. ЯлунчIингу цачIун батIин цIуллушиву дулуннав!
МахIаммад-Расул Кьурбанов:
– Рамазан барз бусурманнансса дарсирдал барзри, мадрасар, школар. Зума дугьаврийну жунма, кьинилун кIийла бунугу, ччатIул касакрал ва щинал ххувлул кьимат гьаз хъанахъиссар, ва ифтIаргу жула цашиврул лишанни. Ххаришиврул чанна лавхъсса симанну дур ва кIанай, Аллагьнайн вихсса инсантурал дакIурдил ххаришиву кувннайх кув дачIлай, ца ххуйсса байрандалул асарду бур цинявннаву. Вайксса инсантуран ччатI бишинсса, укунсса даражалийсса мажлис бувансса даву бигьасса дакъассар, барчаллагь тIий ура, ва давриха зий, захIмат бивхьуминнахь, кумаграл ка кIидархIунахь.
Зарема Аьлиева (ш. Тула):
– На Тула шагьрулий бура зийгу, яхъанайгу. Укунсса ифтIарданийгу цалчинна хъанахъисса. Уттигъанну кунма, на кьамул бувунна Мариян Илиясовал цIанийсса «Дараччи» фондрал Москавливмур филиалданувун, ххарира мукунсса тIайлабацIу ттунма шаврия. Бюххансса, бавтIцириннан асар хьунсса ихтилатру бия лакрал имамтурал, жяматийсса ишккаккултрал, динчитурал. ЧIявусса мюрщисса оьрчIру бия, кьатIувсса дякъия нигьа къабувсун бувкIсса бугьарасса агьлугу бия. БавтIцириннаву бия шанна-мукьра шинал мутталий мизитраву лябуккулий чIярусса давуртту дурну дур тIисса хаварду. Ва мизит баврицIун кабакьлакьисса цинявннанмагу барчаллагьри. Ва ифтIарданул барачат ва цIуну буллалисса мизитравун бавтIсса цинявннал къатравун бухханнав. Жула миллатрал гьарца дувайсса даврий барачат бишиннав!
Ва ифтIарданий дурцири дуаьрдугу Аллагьу Тааьланал кьамул дуваннав!
