Идавстурал касмурду
Жула диндалин бувну, зузаву му так арцу лякъаву къаккаллиссар, Аллагьнайн ﷻ эбадат даврийнгу кIура даяйссар. ХIарамсса даву дурну ляркъусса хъусгу хIарамссар, мунил жула цинярда эбадатругу зия дувайссар. Жула хъус хIалалсса чIумал Заннал барачатгу бишайссар.
ХIалалсса касму ва пиша бушиву хъинну уздансса ишри. Аллагьу Тааьланал Цалва гьан бувсса идавстурангу цания-ца касму дуллуссар. Му куццуй, идавстурал халкь тIайласса ххуллийн кIункIу баву бакъа, гайннал цала каних давугу дувайсса диркIссар, цайминнахьгу дувара учайсса бивкIссар.
Халкьунная укра зад диявринсса тамахI бишаву ва цадакьа чIа тIутIаву – диндалуву ххуйчулий ккаккан бувну бакъар.
МухIаммад Идавсил ﷺ увкуну бур: «Цала каних даву дурну ляркъумунияр хъинсса дукия щилчIав къадуркуссар. Аллагьнал ﷻ идавс Давудлулгу цала каних ляркъумур дукайсса диркIссар» (Бухари, ибн Мажагь).
Бусанну цаппара идавстурал касмурдая:
Адам идавс Алжаннава аьрщарайн уккан увайхту, Жабраил малаикнал ганан лахьхьин бувссар хъузалашиврул давуртту ва къалмуя иникIма даву.
Идрис идавс дунияллий цалчин дарзишиву дурсса инсанни. Ганал арцух янна дуруххайсса диркIссар. Идрислулли халкьуннан лахьхьин бувсса кьаламрах чичлан. Мукунма, ганалли бивзсса астрономиялул ва арифметикалул гьанурду.
НухI идавс ивкIун ур магьирсса тIаннул усттар. Аллагьнал ﷻ гьан бувсса циняв Луттирдаву бувсун бивкIссар НухIлул жами бувсса куц.
Давуд идавс муххал усттар ивкIун ур. Ганал дунияллий хьхьичIра-хьхьичI муххал хIурни дурссар тIар.
Ибрагим идавс ивкIун ур машачи-савдажар. Ганал маша байсса бивкIун бур щарщусса янна дахлай.
Исмяил идавсин авчишиву кIулну диркIун дур.
Муса идавс хIухчуну зий ивкIун ур. Кьуръандалуву бувсун бур Муса хIухчушиву дуллай Шуаьйб идавсил ятту канаки буллай ивкIшиву.
Ильяс идавсил пиша бивкIун бур янна щащаву.
Закария идавсил тIаннул усттаршиву дайсса диркIун дур.
МухIаммад Идавс ﷺ жагьилний яттичIан лагайсса ивкIун ур. Чансса хъуна хьувкун, дахху-ласулухун агьну зун ивкIун ур.
Жунмагу лайкьссар идавстурал оьрмурдая эбрат ларсун курчIил къахъанай, цукун захIматсса даву духьурчагу га багьайкун щаллу дуллай, хIалалну ччатI лякъаву. Аллагьнал ﷻ кабакьиннав!
