“Циванни хIан хIарамсса?”
Ия́с ибн Муаьвият аль-Музани ивкIун ур бюхттулсса табиин (асхIабтурал хъиривсса ник), хъунасса аькьлукар ва аьлимчу. Ца чIумал муначIан ца аьрабнал къапилалул бакIчи увкIун, цIувххуну бур:
– Чахир хIачIаврия вил ци пикри бур? – куну.
– Му хIарамссар, – куну бур Ия́слул.
– Цири муниву хIарамсса, му цIарай кIири дурсса щинаяту ва ахъулссаннуя дакъарив дувайсса. Щин хIачIан ягу ахъулсса дукан хIарам дурну дакъархха!
Ия́слул цIувххуну бур:
– Инава увкумунил ялун уттигу учинсса бурив?
– Бакъар, учин ччимур на учав, – куну бур аьрабнал.
Ия́слул куну бур:
– На цIана кIияма бувцIуну щин вил лажиндарайх рищурча вин цIунцIия хьунссарив?
– Къахьунссар, щиная ци цIунцIия хьуви! – куну бур ганал.
– КIияма бувцIусса аьрщи вийх рищурча, мунил цIунцIия диян дуванссарив? – цIувххуну бур ялагу аьлимчунал.
– Къадуванссар.
Ялагу цIувххуну бур Ия́слул:
– На цIана ларсун вийх нахь рищурча вин цIун бикIанссарив?
– КъабикIанссар, – дуллуну дур жаваб.
– Ларсун гай аьрщи, хIала дурну нахьливух, дуртIуну щин, бургъий кьакьан диртун, яла вийх рищурча, хьунссарив вин цIунцIия?
– Хьунссар, ивчIангума бюхъара, – куну бур аьрабнал.
– Мукунна чахиргу, муниву думур хIала дурххукун, муния шайссар бакI баххана буваймургу, хIараммургу, – куну бур Ия́слул.
