ДакIнивусса загьру
ХьхьичIазаманнай ца душ щар хьуну, ласнал къатлуву ласнал ниттищал яхъанай бивкIун бур, ганиха къуллугъ буллай. Амма ласнал ниттил мудан ганий аьй-бювкьурду дуллай, яхI буван къабюхълай бивкIун бур. ХIукму бувну бур ласнал ниттин загьру буллуну дирчIан дуван.
Душ лавгун бур базаллуву личIи-личIисса уртту дахлахисса цила буттал дусначIан. Бувсун бур цила мурад:
– Ттуща бюхълай бакъар ласнал ниттищал яхъанан. На авлия шавай бура. Ттун кумаг бува, на вин ххуйсса багьа булунна.
– Ттуща ци кумаг буван шайссар?
– Загьру бусса уртту даххи! – увкуну бур душнил.
Хъинну пикригу бувну, уртту даххул жаваб дуллуну дур:
– Хъинни на вин кумаг буванна. Амма кIива зад дакIний бити. Цалчинмур: гацIана инсан ивчIан увайсса загьру булун къабучIиссар, акъахьурча ласнан бувчIинтIиссар му вил канил даву душиву. Мунияту, на вин булунна гьарца кьини чан-чанну дукралувун бичлай га хIаллих дирчIан дувансса загьру. КIилчинмургу: щинчIав щак къабагьаншиврул вин аьркинссар ганиха хIурмат буллан, вичIи дихьлан, увкумур биттур буллан, ссавурданий яхъанан, винма га ххирашиву чIалачIи буван. Мукун буварча, га дирчIайхту щилчIав вийн щак къаучинтIиссар.
Душ рязи хьуну, дуллусса урттугу ларсун шаппай лавгун бур. Гьарца кьини гай уртту ласнал ниттин дуллалисса дукралувун дичлан бивкIун бур. ХIарачат буллай бивкIун бур ганиха хIурмат-аякьа дуллан. Цаппара хIаллава мукун хъинну даххана хьусса арснал щар ласнал ниттин хъинну ххира хьуну дур. Циняв чIахху-чIарахнахь, гъанминнахь буслан диркIун дур цила арснал щарнил ххуйшиву. ДачIи шинава гайннал дянив хъинну ххуйсса арарду цIакь хьуну бур, ниттил ва душнил дянив кунмасса.
Ца кьини душ ялагу лавгун бур буттал дусначIан:
– Лажиннича, ттул ласнал нину ххассал дува, на ганин буллусса загьру чурххава буккан бувансса дару була! Ттун га диркIуну къачча. Га ттун хъинну ххира хьунни.
Уртту даххул пишгу куну увкуну бур:
– Пикри мабав, на вин цукунчIавсса загьру къабуллуссия. Гай бия укунмасса мархха-ххатин. Загьру так вил бакIраву ва дакIнивур бивкIсса, утти му бувкссар вил дакIнива.
