Аьли-асхIаблул аманат

Аьйкьусса Ибн Мулжамлул захIматсса щаву дурну, бусурманнал мукьилчинма халиф Аьли ибн АбутIалиб дунияллия гьан хъунма хIал къаливчIун утту ивхьусса чIумал ганачIан аьтIий увххун ур арс ХIасан . Аьли-асхIаблул цIувххуну бур: «Циван аьтIий ура, ттул арс?». ХIасаннул увкуну бур: «Цукун къааьтIува, ва дунияллийсса вил оьрмулул махъва махъсса лахIзарду чIалай, ина ахиратлувун гьантIишиву кIулну бунува?!». «Ттул арс, на вихь цал мукьва ялагу мукьва аманат буванна. Миннуйн бувну яхъанарча вин ссалчIав зарал къабувантIиссар». «Ми цукунсса аманатрури, буттай?», – цIувххуну бур ХIасаннул .

Аьли-асхIаб буслай айивхьуну ур: «Яла хъинмур хъус – аькьлури. Яла гужмур мискиншиву – ахIмакьшивури. Яла кьурчIимур цувалушиву – цана цува ххирашиву ва дакI хъуншивури. Яла хъинмур ас ва узданшиву – хъинсса хасият, тIултIабиаьт душивури. ХIасаннул увкуну бур: «Ттул ппу, ина мукьва бувсунни. Гайми мукьвагу бусикьай!» Аьлил увкуну бур: «АхIмакьнащал дусшиву мадувара, мунал вин хъинбала буван ччай зарал бувантIиссар. Щялмахъчинащал дусшиву даврия мюхчанну икIу – мунал вин архмур гъанну, гъанмур архну чIалачIи бувантIиссар. Мяшсса инсаннащал дус машара – мунал яла захIматсса чIумал ина кьаитантIиссара. УчIиакъущалгу дусшиву мадувара – мунал ина цанмасса хайрданух аххантIиссара».

islam.ru сайтрава