Нилданул кьурван
Халиф Оьмардул заманнай Мисриллал (Египетнал) бакIчину ивкIссар Аьмр ибн аль-Аьс. Га заманнай Мисриллал халкьуннал аьдат диркIссар шинай цал жагьилсса душ Нил неххан кьурванну булайсса.
Га шиналгу цала аьдат щаллу дуваншиврул, бувкIссар Аьмрдуя ихтияр ласун:
– Нил кьакьавай дур. Ганивун дагьлагисса мюрщи нехру духлаглай дур. Жула аьдат биттур дувансса ихтияр дула! – куну бур.
– Ци аьдатри му? – цIувххуну бур Аьмрдул.
– Ва зурул ацIния кIилчинсса хьхьуну жу язи бугьантIиссар ца жагьилсса душ. Ганил нитти-буттая ихтияргу ларсун, чIюлусса яннардугу лаххан бувну, Нилданувун бутантIиссар. Мунияр махъ ганиву щин чIяру хьуну, буллугъшиву хьунтIиссар.
– Мукунсса тIуллан Исламраву кIану бакъассар! – баян бувну бур Аьмрдул. – Жула диндалул къадагъа дирхьуссар муниха лархьхьусса аьдатирттай!
ЧIун наниссаксса неххаву щин хъиннура чан хъанан диркIун, халкьуннаву гьалакшиву гьаз хьуну дур.
Аьмрдул хIукму бувну бур халифнащал маслихIат ккаккан. Чивчуну бур ОьмардучIан чагъар.
Мисриллал бакIчинал чивчусса чагъаргу бувккуну, халифнал укунсса жаваб дуллуну дур: «Ина тIайласса къел дурссар (неххавун душ бутан къабитаву). На вичIан гьан буллай ура ца чIивисса чагъар. Га вичIанма бучIайхту, Нилданувун бути».
Халифнаясса жаваб дучIайхту Аьмрдун лявкъуну бур гиву чIивисса чагъар. Ганий бивкIун бур укунсса махъру: «Аллагьнал ﷻ лагъная Оьмардуя – Египетнавусса Нил неххайнсса оьвчаву. Ина вила биялалийну щиналгу дурцIуну най духьурча, дурагу къадачирчагу за бакъар, жун ина къааьркинна! Аммарив ина Аллагьу Тааьланал кьудратрайну най духьурча, жу Заннахь чIа тIиссару вил ратIру щинал дуцIин дува тIий!»
Аьмрдул га чагъар Нил неххавун бувтссар. Гьунттимур кьинира ганил зумарду щинал дурцIуну, 16 ссюрхъирал лахъ хьуссар.
Му куццуй, Аллагьнал ﷻ цIимилийну ва халиф Оьмардул аькьилшиврийн бувну, Мисриллаву духлаган дурссар мурдалсса аьдат, халкьгу рязи хьуссар.
