Кьаярал чIапIив

Ца порциялун ишла бувайссар кьаярал ацIва чIапIи (бучIиссар микIлачIун бувссагу), мюрш бувну, хIурунисирал 100 граммращал хIала бувну, ца къуса бартлилгу дирхьуну дукан аьркинссар.

Укунсса дукия гьарца кьини канарча хъиннува хъинссар. ХIурунисиран кIанай цIу чансса нис ишла дувангу бучIиссар.

Ччаннайсса грибокрая

Кьаярал кьакьан бувсса чIапIив мюрш бувну, порошокрайн буккан бувну, ччаннайн, кIиссурттал дянив бичлан аьркинссар. Курс – арулва гьантта. Ва кьяйда хIатта мюрщисса оьрчIру хъин буллалинигу ишла буван бучIиссар, мюхчанссар, зарал бакъасса, анжагъ аллергиялул реакция дакъахьурча.

Ва кьяйда грибок къахьуншиврулгу ишла бувайссар.

Кьавс хьусса чIумал

Мюрш бувсса кьаярал чIапIал ца хъунна къусуйн кIирисса щин дуртIуну, ца ссятрайсса диртун, гьантлун шамийлла, дукра дуркуну 20 минутI ларгун махъ хIачIлан аьркинссар. Укунсса щин хIачIлай 2-3 гьантта хьуну махъ кишечникрал даву цила кIанайн дагьантIиссар.

Атеросклерозрая

Кьаярал чIапIал сокрал 10 мл. 10 грамм ницIащал ххуйну хIала дурну, 10-14 гьантлул дянив, кьинилун 2-лла хIачIан аьркинссар (цал – 10 грамм хIисавну). Укунсса дарув хъинссар «желчно-мочекаменный» азар дусса чIумалгу.

Радикулитрая, подагралия, ревматизмалия, невралгиялия

Кьаярал ккижул 200 граммрая сок дурну, мунивун щусса кисай гьантлун 2-3-ла цIуцIисса кIанай дихьлан аьркинссар.

Чурххава токсинну буккан буваншиврул

Кьаярал чIапIал ва хъахъи къурул сок цара-цану хIала дурну хIачIларчан, чурххава шлакру, токсинну, личIи-личIисса микроорганизмарду дуккантIиссар.