Барча Зумаритавал кьини!
Дагъусттаннал Муфтий, республикалул аьлимтурал советрал председатель шайх АхIмад-афандинал барча бувунни бусурман агьали Зумаритавал байрандалущал
Ас-саламу аьлайкум ва рахIматуллагьи ва баракатугьу! Ххирасса уссурвал ва ссурвал! Хъуннасса ххаришиврущал жува циняв барча буллай, щукрулий ура Рамазан зуруй личIи-личIисса хъинсса давуртту дуллан ва мубараксса байрандалул щадлугъ хьуна дакьин нясив бувсса Заннайн.
Ялагу Аллагьнайн ﷻ щукру, гьашину цачIун бавтIун зумаритавурду дуллан, цадакьа бачIлан, таравихI чакру буллан бюхълай бивкIунтIий. Щукру баву хъинну агьамссар, цанчирча, утигъанну жува буссияв вай неъматирттава чIявуминнуя махIрумну. Оьвчаву дуллай ура, Рамазан зуруй зува буллай бивкIсса хъинбаларду кьукьин къабувну, щала шинал мутталий буллалияра: чIаравминнан кумаг баву, Кьуръан буккаву, цадакьа бачIаву ва м.ц.
БунагьмуничIан зана къабикIансса гуж ва ссавур чIа тIий ура Заннаяту, цанчирча ва байрандалул мяъна – Заннал ккаккан бувсса ххуллу бувгьуну, Аллагьнан ﷻ сси бизанмур къабуллай бачавури. Зума дургьума Аллагьная ﷻ нигьа увсун, дунияллул лазатирттал хъирив къаагьну, цала нафсирал гьавасрая урувччуну ухьурча, мунайн багьа бищун къашайсса чири бияйссар. ХIакьсса талихIрайн уккантIиссар оьрмулул мутталий Кьуръандалул ва Идавсил ﷺ ххуллийх авчума.
ХIурмат бусса уссурвал ва ссурвал, дакIнихтуну Заннахь чIа тIий ура жува Рамазан зуруй бувсса хъинбаларду, зума, ссахI ва дакI марцIну бувсса гьарца аьмал кьамул баву. Зун Аллагьнал ﷻ гьарзад зана дитаннав хъиннура чIяву-хъун дурну. Хъинбаларду бувансса гъира бунува буван къавхьуминнал дакIнивусса ниятирттах бурувгун чири чичиннав! Аллагьнал ﷻ зуй цIими бишиннав, цIуллушиву дулуннав, дунияллий ва ахиратраву так хъинмур ккакканнав. Амин.
