Барча Идавс ﷺ увсса барз
Ххирасса диндалул уссурвал ва ссурвал! ДакIнихтуну зу циняв барча буллай ура щала дунияллул инсаниятран яла агьамсса иш хьусса – ххирасса МухIаммад Идавс ﷺ дунияллийн увксса зурущал!
Идавс ﷺ Аллагьнал ﷻ гьан увссар щалва махлукьатран неъматну, рахIмуну. Га ивкIссар яла ларайсса тIабиаьтирттал, хасиятирттал заллу. Идавсилли ﷺ тIивтIусса чаннайн буккан бувайсса, Аллагь ﷻ кIул шайсса ххуллу.
Аллагьнал ﷻ Цала хъун увну ур Цала Идавс ﷺ Кьуръандалуву (мяъна): «Ина гьан увссара (МухIаммад ﷺ) так щалва аьламрансса цIимину» («Аль-Анбияъ» суралул 107-мур аят).
Кьуръандалул цамур аятраву Идавсия ﷺ увкуну бур: «ХIакьну ина яла ларайми хасиятирттал заллура» («Аль-Калам» суралул 4-мур аят).
Аллагьнал ﷻ жула дакIру дуцIин даннав дазу-зума дакъасса Идавсихасса ﷺ ччаврил. Лайкьсса куццуй сунналул ххуллийх бачинсса тавпикь булуннав, Кьиямасса кьини жуйва цIими бувну Идавсил ﷺ шафааьт нясив баннав!
Аллагь Тааьланахь чIа тIий ура салаватру гьарза дувансса, Идавсил ﷺ оьрмулул тарих лахьхьинсса, ганал сунналул ххуллийх бачинсса каши.
Жула Ватандалий барачат бишиннав, Аллагьнал ﷻ жува бала-апатIирттая ва питнардая буруччиннав. Амин!
