Къат-къатлы пирог
Барыбыз да кёп сюеген пирогну къакъ кюреге ва къоз булан эте. Ал заманларда бир байрам да бу татли аш болмайлы къалмай эди. Гьали де кёплер шону бек сююп ашай.
Ашбазлар пирогну хамурун нечик этегенге гёре тюрлю пикруда. Биревлер ону ярты гюнге къоюп, гётерилгенче сакълама тарыкъ дей, башгъалар шолай этмесе де ярай деп ойлаша. Сонг да, пирогну исси кюйде ашаса къолаймы, сувугъанда ашаса татлими деп эришегенлер де бар. Тёбенде пирогну этеген бир кююн гелтиребиз.
Тарыкълылар: Хамур учун: ун – 350–400 грам, йымырткъа – 1 бола, къаймакъ – 100 грам, кама – 100 грам, шекер – 100 грам, сода – 1 гиччи къашыкъ, май – таваны ичине сюртмек учун. Биринчи къат учун: къакъ кюреге – 200 грам, шекер – 100 грам. Экинчи къат учун: къоз – 150 грам, шекер – 100 грам. Сюртмек учун: сют – 1–2 гиччи къашыкъ, йымырткъаны сариси – 1 бола. Дёгерек таваны ичинде биширебиз.
Биширеген кюй: Йымырткъаны шекер булан къошуп аталайбыз. Шолагъа къаймакъ къошуп, уьстюне сода тёгюп, янгыдан аталайбыз. Арты булан йымышатылгъан каманы къошабыз. Сонг аз-аз этип, унну къошуп, булгъап, йымышакъ тююрлеге ерли гелтиребиз. Тез хамур этип, уьч гесекге бёлебиз ва къурумас учун уьстюн ябып «ял алмагъа» деп бир сагьатгъа къоябыз.
Биринчи къатгъа барагъан къакъ кюрегени йымышатмакъ учун, сувун аз къошуп, отун аста этип къазанда биширебиз (сонг шо сувну кампот гьисапда ичме де ярай). Сувун тайдырып гьазир кюрегени уватып татывуна къарайбыз, тарыкъ болса шекер къошабыз.
Экинчи къатгъа барагъан къозну уватып, шекер булан булгъайбыз. Сонг шондан эки-уьч уллу къашыкъны айырып, пирогну безендирмек учун тайдырабыз.
Хамурну биринчи гесегин дёгерек этип яйып, май сюртюлген таваны ичине салабыз. Хырларындан бираз тайып, уьстюне къоз яябыз. Экинчи хамур гесекни де яйып, къоз къатлавну уьстюне салабыз. Ону уьстюне, хырларындан да тайып, кюреге салына.
Хамурну ахырынчы гесегин де яябыз, кюрегени уьстюне ябабыз ва хырларын тиркеп, бир-бирине басабыз. Лап уьстюне сют къошулгъан йымырткъаны сарисин сюртебиз, алданокъ тайдырылгъан шекерли къоз увакъланы да себебиз. Сонг тиш тазалайгъан гиччи яркъычлар яда назик бичакъ булан пирогну тешебиз.
180–200 градусгъа ерли къызгъан печде пирогну ярым сагьатгъа ювукъ биширебиз. Ашыгъыз татывлу болсун!
