Зайдин Жамболатовгъа
Зайдин Жамболатовгъа
Зайдин билимли алим,
Айтылгъан муаллим.
Оьзден къылыгъы булан,
Пагьмулу къумукъ улан.
Саламат хасияты,
Абурлу, сыйлы аты.
Явсун ниъматлар кёкден,
Гьакъыллы болмас оьктем.
Эки янгъа къарамай,
Ишлей алим арымай.
Кёп сёйлемей эренлер,
Эте пайдалы ишлер.
Рази болсун Аллагьым,
Ари этсин балагьны.
Гюнден-гюн артсын пагьмунг,
Бажарывлугъунг, рагьмунг.
Болсун женнет бавларда,
Атанг да, ананг да.
Гечсин гюнагьларындан
Аллагьым ахыратда.
Илму битмейген байлыкъ,
Инсангъа талайлылыкъ.
Алим – элни чырагъы,
Шавла яя ярыгъы.
Айта гелген аталар,
Гьакъыллы акъсакъаллар:
«Йыгъар билимсиз бирни,
Билимли йыгъар мингни».
Пайхамардан васият,
Илму бизге аманат.
Тюз ёл булан барагъан,
Тюзелир китап тутгъан.
Илму – гюч, илму – къуват,
Аллагьдан уллу савгъат.
Юреги болар рагьат,
Этсе муъмин гьаракат.
Тюз юрюйген сюрюнмес,
Гьакъ ëлунда гьëкюнмес.
«Сабурну тюбю алтын»,
Къойма ишингни ярты.
Зайдин билимли алим,
Айтылгъан муаллим.
Оьзден къылыгъы булан,
Пагьмулу къумукъ улан.
