Къатынына айтма герекмейген сёзлер
Биз эр-къатынны аралыгъы ачыкъ ва алдатывсуз болгъанны яныбыз. Эри къатынына ойлары гакъда айта турмагъа, ону булан гьакълашмагъа тарыкъ, олай да къатын да олжасы булан лап шо кюйде этмеге тийишли.
Нечакъы сюйсе де, тек эри къатынына айтмагъа герекмейген бир-бир сёз тагъымлар бар.
«Иннемей тур!»
Къатыныгъыз булан сёйлегиз. Эгер ол сизин булай сёйлесе, огъар айтмагъа зат табылмай къалмас. Ол айтагъан маълумат къулакъ асмагъа тийишли тюгюл деп ойлаша бусагъыз да, бир мюгьлетге буса да, телевизордан, телефондан гёзюгюзню айырып, ол не сёйлейгенге тынглагъыз, агьамият этегенигизни гёрсетигиз. Шолай янашыв ол учун бек агьамиятлы, аралыкъларыгъыз буса, татувлу болур.
«Бир башгъалыгъы да ёкъ»
Къатыныгъыз не заманда да сизге яхшы болуп гёрюнмеге къарай, шо саялы ол не йимик алышыныв этсе де шону гёрмей, гьис этмей къоймагъыз. Балики, ол чачын янгы къалипде жыйгъан, онгаргъан яда уьйде не йимик буса да алышынывлар этген. Сизин учун шолар нечакъы аз-маз гёрюнсе де, шо алышынвланы эс этгенигизни белгилегиз.
«Анам этеген кюйде эт»
Яшавугъузну ичинде къатыныгъызны анагъыз булан бирт де тенглешдирмегиз. Къатыныгъыз сизин учун яхшы болмагъа къарап, олай да не этмеге де гьазир, гьатта къайнананы басгъынына да къарамайлы. Сиз шо гьалда о-бу ишлерде анагъыз ондан яхшы эте десегиз, къатынны кепи бузулуп, пашман болур. Къатын да, ана да – бюс-бютюнлей башгъа адамлар экенни унутмагъыз.
«Бугюн не иш булан машгъул эдинг?»
Сизин къатыныгъыз гюнню узагъында хыйлы иш эте, шо саялы ону къуллукъларына уьстден къарамагъа тюз болмас. Гьатта ол сав гюн диванда янтайып телевизоргъа къарай деп эсигизге геле буса да. Амма ол гюнню нечик оьтгергенни билмеге яда айтгъаныгъызны этгенми экен деп сораша бусагъыз олай сорав бермеге ярамай къалмас.
«Сен англамажакъсан»
Яшавда не йимик буса да къыйынлыкъланы башдан гечире бусагъыз, шолай гезиклерде къатыныгъыз, озокъда, яннавуругъузда кёмекчи болуп турмагъа сюер. Ол сизге болагъанын этмеге къарай ва сизин авзугъуздан: «Англамажакъсан», – деген сёзлер къатынгъа бек аччы тиер. Балики бир башлап ол англап да битмесдир болуп турагъан ишлени, тек англатсагъыз, гиришмей де къалмас ва сонг оьзюгюзге де шайлы рагьат болур.
Гелишли агьлю яшав къурмакъ учун герек чакъы гьаракат этмекни талап эте ва янгылыш этмейген адам да ёкъ. Бир-биригизден гечмекни, багъышламакъны тилемеге къоркъмагъыз, уялмагъыз ва оьтген яшавдан сынав топламагъа къаст этигиз, шондан таба аралыкълар беклешер ва ювукъ да болур.
МАГЬАММАТ УМАРОВ
