Петерге тутулгъан уьйню нечик онгармагъа бола?
Петерге тутулгъан уьйде (арендованная квартира) яшайгъанда ойлаша къалабыз: шунда заманлыкъгъа гелгенибизни билип, бары да затны бар кююнде къояйыкъмы яда бираз къаст этип, яшайгъан ерибизни онгарайыкъмы.
Кёплер биринчи ёлну тюз гёре ва заманын, харжын биревлени малына зая этме сюймей. Амма, яшав гёрсетеген кюйде, заманлыкъ зат узакъгъа айланма бола. Шолайлыкъ булан, адамлар яшайгъан уьюн онгармай, ят ерде турабыз деген ой булан оьмюрюн оьтгере. Шону орнунда, бираз заманыгъызны ва гючюгюзню къызгъанмай, уьюгюзню арив этип онгарсагъыз яхшы болмасмы дагъы? Тёбенде берилеген ёравларыбыз булан таныш болсагъыз, шолай этмеге бир де къыйын тюгюл экенин гёрерсиз.
Арив гёрюнеген ярыкълар
Уьйню ичин онгарагъанда ярыкълар нечик болажагъыны уллу агьамияты бар. Ич гёрюнюшню бютюнлей алышдырмакъ учун бир-бирде торшер яда ярыкъ береген оьзге алат таманлыкъ эте. Гирляндалар яда ярыкълы йиплер уьйню ичин ёммакъларда йимик арив гёрюнюшлю эте, адамны гёнгюн ала. Ярыкъ береген бу алатланы салмакъ учун ток теллеге тийме гьажатлыкъ ёкъ, олар тынч салына ва тынч чечиле.
Къумач
Уьйлерин нечик безендирегени гьакъда аналарыгъызгъа сорагъыз. Олар сизге перделер, шаршавлар, халилер къоллай болгъанын билдирер. Шолай болма да болгъан. Къумачлар уьйге иссилик берегени алдан берли белгили. Халчаны кёмеги булан ожакъны арив безендирмеге бола. Уьйню онгарагъан дизайнерлер айтагъан кюйде, уьйню ичин безендирегенде не тюслени къоллайгъангъа агьамият бермеге тарыкъ. Авур тюслерден арек болса яхшы, ачыкъ ва енгил ренклер гёзге илинмей, рагьатлыкъ болдура.
Ону-муну сакълайгъан ерлер
Петерге тутулгъан уьйде ону-муну сакълама къыйын бола. Амма уьйде шо якъдан низам ёкъ буса, турагъан ер исси ва онгайлы болуп болмай. Гьар зат ерли еринде тюгюл буса, тазалыкъ да акъсакълай. Контейнерлер, къутукълар, челтирлер (корзины) мал-матагьны тизип жыймагъа кёмек эте. Оланы ятагъан ерни тюбюнде, шкафларда яда оланы уьстюнде салып сакълама ярай. Янгыз опуракъны, ягъынагъан алатланы, савут-сабаны къутукълагъа салып сакъламакъ таманлыкъ этмей. Гьар-тюрлю теллени, хозяйство алатланы, темир-тюмюрню, ашамлыкъ сурсат – буланы барысын да арив этип жыйып сакълама яхшы болур.
Оьсюмлюклер ва безенчиклер
Уьйню ичинде гьар тюрлю увакъ-тюеклер кёп бола. Гюллер булангъы хаба, тамгъа илинген сурат, ерге салынгъан сурайыл (ваза). Булар уьйде кёп болмаса яхшы, тек оларсыз да уьй бош гёрюнежек. Уьйню ичи ялкъывлу буса, тамлагъа тюрлю-тюрлю суратлар илмеге яхшы. Гьалиги заманда гёзге арив гёрюнеген, уьйню ичин безендирмеге болагъан хыйлы тюрлю суратлар тапмагъа тынч. Оланы хас алатлар булан тамгъа илмеге къыйын тюгюл, ялкъгъанда яда гёчегенде рагьат кюйде къайтарып тайдырма да бола.
