Шону этсегиз уьйде чанг болмажакъ
Шону этсегиз уьйде чанг болмажакъ
1. Болгъан чакъы опуракъ жувугъуз. Таза гёрюне буса да, ожакъдагъы къумачдан этилген затланы заманда бир жувугъуз. Перделер, диван яйывлар, шаршавлар, енгил ювургъанлар, аш шаршавлар – уьйдеги лап кёп чанг жыйывчулар.
2. Тазалавну уьй пурхасындан башлагъыз. Чангны увагъы инг башлап ич къалкъыда (потолок) жыйылмагъа башлай ва сонг ондан тюпге мебельге, терезебашлагъа ва жабаргъа тюше. Уьй пурханы (неден этилгенине гёре) сувлангъан чюпюрек яда пылесос булан тазаламагъа герек ва ожакъда чанг шайлы аз болажакъ.
3. Ел чыкъгъанда терезелени ачмагъыз. Уьйге гиреген чанг аслу гьалда орамдан геле, айрокъда шагьарда яшай бусагъыз. Озокъда, уьйге таза гьава гийиртмеге герек, тек гьава гийиртип битгендокъ терезелени тез япмагъа яхшы, айрокъда къырда ел чыкъгъан буса. Терезелеге жибинден сакълайгъан сеткаланы салмагъа унутмагъыз, неге десе о чангны да аз эте.
4. Халчалар яяйыкъмы-яймайыкъмы? Халчалар – уьйню толтура ва онгайлыкъ болдура, айрокъда юнден этилген буса. Амма шолагъа тийишли кюйде къарамагъа ва тазаламагъа да герек. Эгер де жабар бою ковролин яйылгъан буса, ону орнунда ламинат, паркет яда плитка салмакъны гьакъында ойлашма тюшедир.
5. Ябылгъан шкафлар. Ачыкъ такъчалар (полка) кёп болгъан сайын чанг да кёп болур. Суратлар, сувенирлер, оьзге увакъ-тюек чанг жыя ва уьй тазалавну уллу къыйынлыкъгъа айландыра. Шо такъчаланы ябылгъан шкафлагъа алышдырса, чанг да жыйылмас, тазалыкъ юрютме де шайлы тынч болур.
6. Гьаваны сувландырыв. Уьйню ичине гьаваны сувландырагъан алат салса, шо электрик статиканы басылтар ва уьйню ичиндеги чангны да учмагъа къоймас. Бу алатны кёмеги булан гьаваны сувлангъанлыгъы герекли нормагъа гёре сакъланмагъа бола.
7. Эшик алдагъы хали. Шону кёмеги булан уьйге аякъгийим булан гиреген нас шайлы аз бола. Амма тюклю халилер яймагъа тарыкъ тюгюл, неге десе олар оьзлер де чанг жыймагъа башлажакъ. Олайланы орнуна резинден этилгенин салса яхшы болур, гьатта ону жувуп таза сакъламагъа да хыйлы рагьат.
