Низамны не этип де сакълама къарайыкъ
Кёбюсю тиштайпа иш болжалы бир ёрукъда тюгюлюне къаршы бола. Загьматы бир къалипге гёре юрюлмейген саялы, къатынгиши юхудан тоймай къалма, тез арыйгъан болма ва савлугъуна оьзге якъдан зарал гелтирме бола. Юхуну ёрукълу этмек учун тёбенде бир-нече ёрав беребиз.
- Юху учун заман белгилегиз. Загьматны вакътиси алышына буса да, юху гьар гюн бир вакътиде болмакъны гьайын этигиз. Шолай этмеге болсагъыз, къаркъара юхуну вакътисин «билежек» ва шогъар кюйленежек. Имканлыкъ бар буса, гюндюз де юхлама къарагъыз. Тюш вакътиде бираз юхласа да, гюч бере, ишлеме къуват геле.
- Юху учун онгайлыкълар болдуругъуз. Юхлайгъан уьйню къарангы этигиз, таза гьава гирсин, артыкъ исси де болмаса яхшы. Юхудан толу кюйде тоймакъ учун онгайлы тёшек ва бойлукъ гьазирлегиз. Юхлама ятгъанча телефонгъа бакъмакъдан сакъ болугъуз, неге десе ону гёк ярыгъы юху къачыра.
- Юхлагъанча кофе ичмекден ва авур ашдан сакъланыгъыз. Кофе ва шолай оьзге ичкилер юху къачдыра ва ятгъанча шоланы къолламаса яхшы. Гьатта гюнню экинчи яртысында шоланы ичмесе яхшыдыр. Шо кюйде гече кёп ашамакъдан сакъланма герек, тек ач ятма да тюшмей. Енгил ашлар къаркъарагъа рагьатлыкъ бере ва юхугъа гьазирленме кёмек эте.
- Ял алма кюйлер табыгъыз. Юхлама ятгъанча авур ойлардан эркин болуп, рагьатланма къарагъыз. Шону учун тыныш алыв гимнастика яда китап охув булан машгъул болма ярай. Рагьатлыкъ тапма кёмек этеген ёлну излегиз ва юхлагъанча шо «адатны» юрютюгюз.
- Гюн нечик оьтежекни гёз алгъа тутугъуз ва этилме герекли ишлени белгилегиз. Гюн сюйген кююнде оьзлюгюнден гете буса, инсан къарсалавлу гьалгъа тарыма ва арыма бола. Оьзюгюзге гюч болгъанны сюймей бусагъыз, гюнню ичинде этилме герекли ишлени гёз алгъа тутугъуз ва шогъар гёре юрюгюз. Шолай этилсе, нервалар да сав къалар, юху да къатты болар.
- Савлукъну гьалына тергев беригиз. Арыгъанлыкъны яда юхугъа тартагъанлыкъны сезе бусагъыз, ишлеригизни енгил этмеге, юхугъа заман тапмагъа къарагъыз. Балики, сизге ял алма яда юхлап чыкъма тарыкъдыр. Къаркарагъа тынглап юрюсе, яхшы болар.
- Къыйыныгъызны касбучугъа билдиригиз. Не этсегиз де, юхуну масъаласы таймай буса, доктор-сомнолог деген касбучугъа барып, ондан кёмек излегиз. Балики, медицина якъдан себеп бардыр ва касбучу къошулмаса, шо масъала чечилмес.
- Айлана якъдагъыланы кёмегине таяныгъыз. Гюнлюк низамыгъызны гьакъында ювукъ адамларыгъыз ва иш ёлдашларыгъыз булан гьакълашыгъыз. Олардан якълав ва кёмек тилегиз. Сизге кёмек этме гьазир турагъанлар барны билегенлик яшавну шайлы къолайлашдырма, рагьат этмеге бола.
Загьмат къайда бир ёрукълу тюгюл заманда низам болдурмакъ тынч болмай ва герек чакъы агьамият, гюч талап эте. Амма низам болдургъан гиши сонг сююне, неге десе савлугъу да къолайлаша, яшаву да рагьат оьте. Гьар гюнлюк толу юху – къатты савлукъну, загьматгъа берилмекликни, арив хошну кюрчюсю экенни унутмайыкъ.
