Узакъ заман ишлемеген сонг янгыдан загьматгъа гиришебиз
Ишлейген гьар тиштайпаны яшавунда загьматны къойма борчлу этеген себеплер болмай къалмай. Шо себеплени арасында яш тувгъанда декретге чыгъыв, авруйгъан къардашыны гьайын этив, бир ерден башгъа ерге гёчюв яда оьзге ишлер болмагъа бола. Нечик болса да, узакъ заман ишлемей тургъан къатынгиши янгыдан иш тапмагъа ва гьатта оьр къуллукълагъа етмеге бола.
1-нчи абат: тувулунгъан гьалны ахтарыв
Биринчи абат – болуп турагъан гьалны ахтарыв (анализ этив). Оьз сынавугъузну, не этме болагъаныгъызны ва билимигизни багьалагъыз. Алдагъы ишигизде не къуллукъну кютгенигизни, нени этип бажарагъаныгъызны эсге алыгъыз. Шолай этсегиз, къайсы тармакъда загьмат тёкме болажагъыгъызны англама тынч болар. Не къуллукъну кютме боласыз? Ишде не уьстюнлюкге етме сюесиз? Бу соравлагъа жавап берсегиз, къайсы тармакъда иш излеме герегин рагьат билерсиз.
2-нчи абат: оьзюгюзню гьакъында соцсетлерде билдирив
Оьзюгюзню гьакъында толумлу кюйде билдирме болсагъыз, иш берегенлер сиз не адам экенни англама болар. Сынавугъузну, не иш этип болагъаныгъызны ва билимигизни гьакъында янгыртып маълумат беригиз. Артда этген ишлеригизни эсгеригиз ва охуп битген курслар бар буса, шоланы да языгъыз. Оьзюгюзню къайда тапма болагъанны, телефон номерегизни бермеге унутмагъыз.
3-нчю абат: иш излев
Иш тапмакъ учун хыйлы ёл бар: иш тапма кёмек этеген сайтлар, касбучулар излейген сетлер, ишге тюшмек учун кёмегин этеген агентликлер ва оьзге къайдалар.
Иш сайлайгъанда сынавугъузну ва не этме болагъаныгъызны гьисапгъа алыгъыз. Касбугъузгъа ошашлы башгъа тармакъларда иш излеме де тартынмагъыз.
4-нчю абат: лакъырлашывгъа гьазирленив
Ишге алгъанча иш еси лакъырлашыв оьтгере – шогъар арив гьазирленме герек. Сынавугъузгъа, не этме болагъаныгъызгъа, уьстюнлюклеригизге, муратларыгъызгъа гёре соравлар берилежекге гьазир болма тарыкъ. Иш есиге сиз не берме боларны гьакъында ойлашыгъыз. Сынавугъуз ва билимигиз компаниягъа не пайда берме бола? Арив ишлеп болагъаныгъызны гёрсетип, суратлама бажарсагъыз лап яхшы болар.
5-нчи абат: бажарывлукъну артдырыв
Пелен тармакъда ишлеп шайлы сынав топлагъан бусагъыз да, янгы къайдалар, технологиялар алышынма бола. Шо саялы оьзгелерден артда къалмас учун, билимигизни даим артдырыгъыз. Яшавгъа гёре юрюме сюегенлер о-бу курсларда охуй, тренинглеге яда вебинарлагъа бара, демек оьсювню ёлунда. Касбугъузда не болуп турагъанны билмек, янгылыкъланы ахтармакъ не заманда да пайдалы ва негьакъ билим тюгюл.
6-нчы абат: касбу ёлдашлыкъны унутмай юрютмек
Касбу ёлдашларыгъызны унутмагъыз, олар булангъы къатнавну уьзмегиз. Касбугъузда чалышагъан, ишин яхшы билеген адамлар булан таныш болмакъ, байлавлукъ тутмакъ учун, гьар тюрлю конференцияларда, чараларда ва ёлугъувларда ортакъчылыкъ этигиз. Шолай этме болсагъыз, къайда ва не ерде иш излейгенлер барны билерсиз, ёлдашларыгъыз сизин гьакъда иш берегенлеге билдирме болар, къатнавугъуз да генглешер.
7-нчи абат: заманыгъызны ва нерваларыгъызны аяп сакълагъыз
Хыйлы заман ял алгъан сонг, янгыдан загьмат башламакъ бир-бирде къарсалавгъа айланма бола. Заманыгъызны ва нерваларыгъызны аяп сакълама болсагъыз янгыдан загьмат башламакъгъа пайдалы болар. Заманны маънасыз харжламакъдан сакъланма кёмек этеген кёп ёравлар бар, шоланы къоллама къаст этсегиз, ишигиз алгъа баражакъ, муратлагъа етме боларсыз. Сонг да ял алма унутмагъыз, савлукъну гьайын да этигиз.
8-нчи абат: кёмек тилеме уялмагъыз
Касбугъузда сизден артыкъ билеген, сынаву кёп адамлардан кёмек излеме тартынмагъыз. Оланы билими ишигизни къолай кютмеге ёл ача. Оьсмек, гёрмекли натижагъа етмек учун, сынавлу ёлдашны ёравлары шайлы пайда гелтирме бола. Сынаву бар, ишин яхшы билеген загьмат ёлдашыгъыздан пайдаланма къарагъыз, шо имканлыкъны къутгъармагъыз.
Бу ёравлагъа гёре юрюсегиз, янгыдан загьмат башлагъанда уьстюнлюкге етмеге боларсыз. Оьз-оьзюгюзге инаныгъыз, шекленмей алгъа барыгъыз, билим алывну токътатмагъыз, ишге шолай янашсагъыз, уьстюнлюк болмай къалмас. Ишигиз онглу болсун!
