Мачийлени жувабыз
Мачийлени жувабыз
Мачийлер (тапочки) – кёплерибиз бек сюеген уьйде гийилеген аякъгийим. Терлеген аякъланы ийиси бир-бирде мачийлеге сингип къала ва сонг олардан яман ийис гелеген бола. Эсги болмагъан олай мачийлени ташлама къызгъанасан. Шолай гезиклерде оланы жувмакъ къала.
Мачийлени нечик жувма тюшегени олар неден этилгенинден гьасил бола.
Къой териден этилген мачийлер.
Булай мачийлени ийис сапун къоллап, исси сувда къол булан жувса яхшы болур. Жувуп битгенде сыкъмагъа тарыкъ тюгюл, силкип, къурума салабыз. Шолай этсе гёрюнюшюн тас этмес. Булай мачийлени кёп жувма тарыкъ тюгюл, йылда эки керен жувса таман.
Резин мачийлер.
Оланы жувуп турмаса да ярай – сувлу чюпюрек булан ишып, агъагъан сувну тюбюнде чайса таманлыкъ эте. Ябушуп таймайгъан насны сода булан жувса, таза да болур, бактерийлер де таяр.
Кийиз мачийлер.
Кийиз (войлочный) мачийлени тазаламакъ учун, опуракъ жувагъан машинни къолламаса яхшы. Ичине бир гесек ийис сапун да салып, исси сувда йибитебиз. Сапун сувда ону ярым сагьат къоюп, сонг чыгъартып салкъын сув булан чаябыз, силкип-силкип къурума къоябыз. Сыкъмаса да ярай.
Оьбек ултанлы мачийлер.
Ултаны оьбекден (пробка) этилген мачийлени де сувлу чюпюрек булан тазаласа таман. Эгер бек батгъан буса, савут жувагъан химия алатланы яда сирке ханц (уксус) къоллайбыз. Жувуп битип мачийлени яхшы къурумагъа къоябыз.
Къумачдан ва гёнден этилген мачийлер.
Булай мачийлер арив тигилген, оланы опуракъ жувагъан машинкада жувмагъа ярай. Шолай жувагъанда зиян болмас учун, мачийлени бир гиччи дорбаны ичине салма бола. Артыкъ порошок къолламаса яхшы.
