Яш бусурманны эдеплери
Яш бусурманны эдеплери
(Давамы. Башы алдагъы номерлерде)
6-нчы бёлюк. Савлукъ – инсанны байлыгъы.
26-нчы дарс. Яман хасиятлар.
Есибиз Аллагь ﷻ бар-барлыкъны яратгъан. Ол инсангъа арив къаркъара берип, ону огъар аманат этген. Къаркъарабызгъа зарал этип къойсакъ, шо саялы Аллагьны ﷻ алдында жавап бережекбиз.
Кимесе къаркъарасына яда жанына зиян эте буса, Есибизни буйругъуна енгил янашгъан бола.
Хыйлы адам яман мердешлени юрюте, масала, сигарет тарта. Бу – инсанны савлугъуна уллу зарал гелтире, демек гюнагь ишлерден. Даим сигарет тартагъан гиши авур аврувлар къазана, айлана якъдагъылагъа да зарал эте. Ислам дин айлана якъгъа зарал этмекни къадагъа эте. Сигарет тартагъан адамдан гелеген яман ийис ондан башгъаланы уьркдюре.
Динге ва савлукъгъа болагъан заралдан къайры, сигарет тартыв инсанны малына да зиян эте, неге десе бу яман мердешге ол кёп акъча чыгъарта. Шо харжлангъан маяланы пайдалы ишлеге: пакъырлагъа, етимлеге, авруйгъанлагъа бермеге болар эди.
Ислам динде сигарет тартывдан къайры, адамны къаркъарасына, малына ва айлана якъдагъылагъа зараллы оьзге яман хасиятлар да гюнагь санала.
Адамны сигарет тартагъан яда башгъа яман хасияты бар буса, тез-тез шондан айрылма тарыкъ, неге десе шондан ол оьзю ва къырыйындагъылар да зараллана. Олай да, Есибизге яман хасияты саялы товбагъа тюшюп гечмекни тилемеге тарыкъ.
(Давамы гелеген номерде)
