Рагьмулукъ ва илиякълылыкъ – къурдашлыкъгъа элтеген ёл
Рагьмулукъ ва илиякълылыкъ – къурдашлыкъгъа элтеген ёл
Гюн яхшы болсун, аявлу гиччипавлар! Бугюн сизге бек агьамиятлы ва терен маъналы хабарны айтмагъа сюебиз.
Биринчи класдагъы охув – яшавубузда этилеген башлапгъы абатланы аслуларындан. Биз гьар якъдан кёп янгы билим алабыз, олай да жамиятда къатнамагъа уьйренебиз. Аминат дейген охувчу къызыбыз бизге оьзю булан болгъан ишни гьакъында яза. Балики, сизге де шондан уьлгю ва пайда болур.
«Гетген йыл мен биринчи класгъа бардым. Мени учун шо тынч болмады. 1-нчи сентябрьде класыбызгъа гелгенде биз бир-бирибиз булан таныш болмагъа башладыкъ. Мен шоссагьат кёп яш булан къурдаш болдум. Амма бир къыз неге буса да магъа яман сёйлей эди. Сорав берсем яда бир зат тилесем ол сан да гёрмей, жавап бермей къоя эди. Магъа шо яман тийди. Мен ону булан къурдаш болмагъа сюйсем де, нечик дурус этмеге тарыгъын билмей турдум.
Анам булан биз школаны, дарсланы ва яшланы гьакъында кёп хабарлай эдик. Мен огъар шо къыз булан аралыгъым тюзелмей турагъанны айтдым. Бираз ойлашып, анам магъа сабур болмагъа ва ол къызгъа илиякълы, рагьмулу янашмагъа ёрады. Яман сёйлесе де, шогъар агьамият бермей къоймагъа да уьйретди. Тюзюн айтса, мен шо ёравлардан пайда болажакъгъа инанмай эдим, тек анам айтгъанны этип къарама сюйдюм. Сабурлугъумну жыйып, айтылгъан кюйде этмеге башладым. Озокъда, шо тынч болмады. Тамаша иш, тек охув йылны ахырына шо къыз оьзю башлады мени яныма гелмеге ва къатнамагъа, яман сёйлейген кююн де къойду. Бир-бирде буса мен ону булан бир партаны артында олтура эдим. Гьали биз экинчи класда охуйбуз ва къурдашлар болдукъ».
