Къоркъмай алгъа

Ахшам Гьасан анасы булан янгы охув гюнге гьазирлене, рюкзагын жыя. Тангала улан башгъа школагъа чыгъа.

Гьазирленеген чакъы заман Гьасан сёйлемейген кюйде тептерлерин, китапларын онгара ва гьатта анасы чакъыргъанны да эшитмей.

Уланы пашман ойлагъа батгъанын гёрюп ана огъар: «Не болгъан?» – деп сорай. Яш ойлаша къалгъанын ана эс этмей болмай. Гьасан да негер пашман экенин айта ва янгы ёлдашларындан ва муаллимлерден тартынагъанын билдире. Улан айтгъан кюйде, ол янгы школада оьзюн ят гёрежек, уьйренген къурдашларын сагъынажакъ ва башгъа ерде къыйын болажакъ.

Ана баласыны башын сыйпап, огъар маслагьат эте. Ана Гьасангъа ол биринчи класгъа барагъанда да булай ойлагъа батып къалгъанын эсине сала ва шо заман нечик болду дагъы деп сорай.

Гьасан ойлаша къала ва:

– Шо заман мен билген кюйде, муаллимлер бек яхшы адамлар болуп чыкъды ва хыйлы яхшы яш булан къурдашлыкъ тутдум, – дей.

Ана иржайып:

– Бары да адам янгы затлардан къоркъа, амма инсанлар шо къоркъувун басылтма болмай эди буса, денгизлеге чыкъмас эди, янгы топуракъланы танымас эди, илму ахтарывлар алгъа бармас эди. Уллу болгъанда ким болма сюегенингни сен оьзюнг де айта эдинг чи, – дей.

– Гьали де айтаман. Мен – космонавт болма сюемен, – деп Гьасан билдире.

– Бары да янгы ишлерден инсан урлукъ къоркъа эди буса, космосну адамлар нечик ахтарар эди дагъы? – деп ана сорав бере. – Янгы затдан къоркъма тарыкъ тюгюл, бюдюремей шогъар багъып абат алмагъа ва янгы-янгы ишлени ачмагъа герек.

Гьасан анасына тынглап, къоркъувун басылтма къарай. Артындагъы гюн ол школадан шат кюйде бек сююнюп геле. Ол анасына айтгъан кюйде, къоркъмагъа себеп болмагъан: муаллимлер ажайып адамлар, янгы класдагъы яшлар буса, тарыкъ болса огъар дарс этмеге кёмек этежек, янын тутажакъ.

Шо гюнден тутуп Гьасан бир янгы затдан да дагъы къоркъмажакъман ва къоччакъ улан болажакъман деп анасына сёз бере.

Айшат Расулова