Къурбан садагъаларыгъызны Аллагь ﷻ къабул этсин!
Къурбан садагъаларыгъызны Аллагь ﷻ къабул этсин!
Аявлу къардашлар ва къызардашлар, Россияны бусурманлары!
Гьакъ юрекден Ид аль-Адха байрам (Къурбан-байрам) булан къутлайман сизин!
Бу байрам гюн къурбан соймакъдан таба Есибиз Аллагь ﷻ бизге береген агьамиятлы дарсланы эсге алабыз. Бу гюн гьарибиз Яратгъаныбызгъа берилгенлигин гёрсетме ва олай да ювукъ адамларыбызны гьайын этмеге болабыз.
Къурбан-байрам садагъа оьлешмекни, къурбан соймакъны ва Аллагьутааланы разилиги учун къасткъылмакъны эсибизге сала. Шо гюн кёмегибизге къарагъанлар булан сююнч гьислер сезебиз, къардашларыбызны, къурдашларыбызны уьстюне барабыз, къурбан садагъабызны, яхшы амалларыбызны Аллагь ﷻ къабул этсин деп тилейбиз.
Есибиз Аллагь ﷻ Къуръанда булай айтгъан (маънасы): «Яратгъаныбызны ёлунда оьзюгюз сюегенни (малыгъыздан) харжламай туруп, сиз бирт де берекет гёрмессиз (Есибизни разилигин де). Ва нечакъы харжласагъыз да, Аллагь ﷻ шо гьакъда биле (ва тийишли кюйде шабагъатлар сизин)» («Али Имран» деген сура, 92-нчи аят). Шу сёзлер яхшы ишлер этмеге ва къырыйыгъыздагъылагъа агьамият бермеге (айрокъда къыйынлы гьалдагъылагъа) ругьландырсын сизин, байрам гюн айрыча.
Дерия йимик уллу Ватаныбыздан сыйлы ерлеге, Маккагъа ва Мадинагъа, минглер булан къардашларыбыз ва къызардашларыбыз Ислам динни борчларыны бириси – гьаж къылмакъ учун ёлгъа чыкъгъан. Яратгъаныбыз олагъа гюч берсин, къылгъан гьажын къабул этсин ва гьар яхшы ишин шабагъатласын деп дуа этебиз. Оланы намазларын ва сойгъан къурбанларын Аллагь ﷻ къабул этсин, юреклери буса имандан ва берекетден толсун, къабул этилген гьажы булан эсен-аман агьлюлерине къайтсын деп алгъыш этебиз.
Бу сыйлы гюн уьлкебизде де, сав дюньяда да парахатлыкъ, гелишлик болсун деп Аллагьдан ﷻ тилейбиз. Бары да бусурманлагъа Яратгъаныбызны рагьмулугъу ва берекети болсун ва балагьлардан, питнелерден сакъласын бизин.
Аявлу къардашлар ва къызардашлар! Бары да намазларыгъызны, садагъаларыгъызны ва сойгъан къурбанларыгъызны Аллагь ﷻ къабул этсин деп тилеймен! Амин!
Къурбан-байрам къутлу болсун!
