Къыйматлы вакъти геле
Къыйматлы вакъти геле
Дюньяланы Еси, Яратгъаныбыз Аллагьгъа ﷻ рагьмулугъу ва дерия чомартлыгъы булан бизин шу берекетли гюнлеге етишдиргени саялы битмесдей макътав этейиклер.
Рамазан – Есибизни каламы Къуръан тюшюрюлген ай. Къуръан Яратгъаныбызны ахырынчы Китабы, алдагъы бары да язывланы жамы, иманы барлар учун рагьмулукъ булан йиберилген яшама герек кюйню буйругъу.
«Аль-Бакъара» сураны 185-нчи аятына этилген баянлыкъда булай айтыла (маънасы): «Рамазан айда, Къуръан тюшюрюлген – адамлар учун гьакъ ёл гёрсетивчю, ичинде тюз ёл англатылгъан ва айрылыкълар белгиленген (гьакъыкъатны ва ялгъанны арасында)…».
Есибиз Аллагь ﷻ рамазан айда Лайлят уль-Къадр (Хадир гече) барлыгъы булан ону оьр этген. Сыйлы Къуръанда бу гечеге «Аль-Къадр» деген сав сура багъышлангъан. Онда булай айтыла (маънасы): «Мен Къуръанны къудратны ва къадарны гечесинде тюшюргенмен». Арты булан, Пайхаммаргъа ﷺ багъып Есибиз булай айта (маънасы): «Лайлят уль-Къадр дегенни сен не билмеге боласан?» Ва сонг булай англата (маънасы): «Лайлят уль-Къадр минг айдан артыкъ» (шо гече этилген яхшы ишлер учун болагъан шабагъат, бу гече ёкъ оьзге минг айда этилгенлеринден артыкъ). Сонг да, бу гече танг къатгъанча бола деп айтыла, демек шо гечени къайсы вакътиси де къыйматлы.
Рамазан ай башланыву булан Пайхаммар ﷺ булай айта болгъан: «Бизге рамазан ай гелди – рагьмулукъну айы. Ва Аллагь ﷻ шону ичинде бизин уьстюбюзню яба (Оьз рагьмусу булан), гюнагьларыбыздан гече, дуаларыбызгъа жавап бере ва яхшы ишлерде этилеген ярышларыбызгъа къарай ва Оьз малайиклерини алдында сизин булан оьктем бола. Шолайлыкъ булан, Яратгъаныбызгъа яхшы амалларыгъызны гёрсетигиз, гьакъ кюйде, шо айда Аллагьны ﷻ рагьмусундан къуру къалгъан адам талайсыздыр» (аль-Байгьакъи).
Шолай болгъан сонг, оьрде айтылгъанны биле туруп, берилежек ажайып уллу шабагъатдан куру къалмас учун, бизден болагъан гьаракатны этмеге къаст этейиклер. Гюнагь иш этмекден сакъланайыкъ, неге десе яхшы ишлер учун шабагъат кёп керенлер артагъанда йимик, гюнагь саялы болагъан такъсыр да хыйлы арта. Шу айда гечмеге уьйренейик ва бир-бирибизге рагьмулу янашайыкъ, чыдамлыкъ ва чомартлыкъ булан къутулма къарайыкъ, неге тюгюл яшавубузда шо лап яхшы юк болуп токътай.
Есибиз Аллагь ﷻ бу рамазан айны ва олай да къалгъан яшавубузну багъыйлы оьтгермеге кёмек этсин, Огъар ибадат этив, Яратгъаныбызны бары да буйрукъларын кютюв умуми яманлыкъдан сакъланмагъа болушлукъ этсин. Амин!
