Етишип гелеген Ораза байрам булан Дагъыстан муфтиси шайых Агьмат-афандини къутлаву
«Ассаламу алейкум ва рагьматуллагьи ва баракатугьу!
Аявлу къардашлар ва къызардашлар! Гьакъ юрекден етишип гелеген уллу байрамыбыз – Ораза байрам булан къутлайман сизин.
Бу берекетли гюн бары да бусурманлар сююне ва ораза тутмагъа, къошум намазлар къылмагъа, гьажатлылагъа кёмек ялгъамагъа ва шолай оьзге яхшы ишлер этмеге болгъаны саялы Есибизге разилик билдире.
Рамазан айны узагъында сав дюньядагъы бусурманлар ашдан, сувдан, оразаны бузагъан оьзге бары да ишлерден сакъланып турду. Шолайлыкъ булан, дюньяланы Есине таби болду, дазусуз рагьмулугъуна умут булан, Ону буйрукъларын кютдю.
Гьар йыл шо айны ичинде миллионлар булангъы иманы барлар къардашлыкъ аралыгъын беклешдире, айрыча чомартлыгъын гёрсете, айлана якъгъа рагьмулу ва языкъсынавлу янаша, амалсызлагъа кёмек эте. Ораза айны вакътисинде гьар сюйген адам ифтарлар этип, шоларда ким де ортакъчылыкъ этмеге бола. Къаркъараны аш тойдурагъанда йимик, шо вакътиде алимлени насигьатындан инсанлар ругьун да тойдура. Есибиз Аллагь ﷻ гьар этген яхшы амалыгъызны къабул этсин, битмес яхшылыкълар булан шабагъатласын.
Булай жыйынларда жамиятны бары да къатлары ортакъчылыкъ этегени сююндюрмей болмай. Олар миллетге, динине гёре айрылмай, ёлбашчылар да, простой адамлар да бирче жыйыла. Бир-биревге пайда этмеге къаст къылыв, рамазан айдан ва Яратгъаныбызны рагьмусундан сююнегенлик оланы бирикдире, ювукъ эте. Шолай жыйынлар халкъны бирикдире, къардаш гьислени беклешдире, олай да, патриот ругьну гётере ва ватаныбызгъа бакъгъан сюювню артдыра.
Шу сыйлы гюнлени янгыдан гёрмеге имканлыкъ берген саялы, Есибизге зор макътавлар этемен, гележек йылларда да Оьзюню рагьмусундан къуру къоймасын деп тилеймен.
Рагьмулу Есибиз бары да гюнагьларыбыздан гечсин деп тилеймен. Олай да, шу айда тутгъан оразаларыбызны, этген дуабызны, садагъабызны (секет) ва бары да яхшы амалларыбызны Есибиз къабул этсин ва рагьмулугъуна гёре шабагъатын кёп керен артдырсын деп тилеймен!
Рамазан айны узагъында жыйгъан яхшы амалларыбызны югю бизин булан даим къалсын ва айрылма болгъан бары да яман ишлерибиз ва гюнагьларыбыз бизге дагъы къайтып гелмесин!
Шу берекетли айны гьюрмети учун, балагьлардан ва хатарлардан, питнеден ва давдан сакъласын деп Къудратлы Есибизден тилеймен. Олай да, бизге чыдамлыкъ ва парахат яшав ва адиллик саялы гьали дав этегенлеге къаттылыкъ бермекни тилеймен. Амин!»
