Дагъыстан муфтини къутлаву
«Ассаламу алейкум ва рагьматуллагьи ва баракатугьу! Аявлу къардашлар ва къызардашлар! Гьакъ юрекден етишип гелеген сыйлы рамазан ай булан къутлайман сизин. Бу пикирлешеген, къаст къылагъан ва таби болагъан, яхшы ишлени, тазалыкъны ва рагьмулукъну, олай да, Есибизни машгьур чомартлыгъыны берекетли заманы.
Рамазан – Есибизни рагьмулугъу, неге десе шу айда Яратгъаныбызны Каламы – Къуръан тюшюрюлген. Бу ажайып савгъат адамлагъа яшамагъа герек кюйню гёрсете: яхшылыкъгъа чакъыра ва яманлыкъдан сакъланмагъа буюра.
Рагьмулу бу айгъа етишгеник саялы, Есибизге шюкюрлюк этмеге герекбиз, Аллагьгъа ﷻ – дюньяланы Есине шу вакътини болгъан чакъы пайдалы оьтгермеге кёмек этсин деп де тилемеге тарыкъбыз.
Бу нюрлю айны ичинде Яратгъаныбыз бизге сыйлы болгъан ораза тутувну буюргъан. Рамазан айда ораза тутагъанлар бары да яман ва эрши затлардан: артындан сёйлевден, ялгъандан, айтды-къуйтдудан, эришивден, яман ойлардан сакъланмагъа тарыкъ. Шоланы орнунда яхшы амаллагъа гьаракат этмеге герек. Шо саялы рамазан – янгыз къаркъараны тазалайгъан ай тюгюл, некъадар, жаныбызгъа хас нукъсанлыкълардан тазаланыв да дюр.
Айлана якъдагъыланы башын сёйлемегиз, неге тюгюл сёз булан барындан да авур яра салмагъа бола ва шо саялы Есибизни алдында жавап тутмагъа тюшежек. Гюнагьлардан гечив болажакъгъа умут булан, яхшы ишлер этигиз ва оьз уьлгюгюз булан айланадагъыланы таза къылыкъгъа ва асилликге чакъырыгъыз. Кимге кёмек этмеге болагъаныгъызны да унутмагъыз, неге десе шо дюр Аллагьны ﷻ алдындагъы бизин борчубуз. Гьажатлылагъа бола туруп садагъа оьлешигиз.
Мугьаммат Пайхаммар ﷺ булай айтгъан: «Гьакъ кюйде, женнетде “ар-Райян” деп айтылагъан хас къапу бар. Къыямат гюн женнетге шолардан таба янгыз ораза тутагъанлар гирежек ва дагъы бирев де гирмежек. “Ораза тутагъанлар къайда?” – деп соралажакъв ва олар шондан таба гирежек. Оланы ахырынчысы гирип битгенде къапу ябылажакъ ва дагъы бирев де шондан гирмежек» (аль-Бухари, Муслим).
Ораза тутагъан айны къыйматлыкълары кёп ва шо саялы бизин къастыбыз да рамазан айда шогъар гёре болмагъа тарыкъ.
Бугюнлерде бютюн адам урлукъ уллу сынавланы башдан гечире. Юрегин тазалыкъда сакълап ва гелишликни тас этмей, шолардан оьзден кюйде оьтмеге янгыз гьакъ юрекден инаныв ва Аллагьгъа ﷻ бакъгъан умут кёмек этер. Есибиз шо гьакъда Къуръанда бизге булай эсге сала (маънасы): «Ва, гьакъ кюйде, къыйынлыкъдан сонг – енгиллик. Гьакъ кюйде, къыйынлыкъдан сонг – енгиллик» («Аль-Инширах» деген сура, 5–6-нчы аятлар).
Бу къыйынлы девюрде юреклерибизни беклешдирсин ва чыдамлы этсин деп Есибизден тилеймен. Олай да, бары да аврувлардан, питнелерден ва балагьлардан аман сакъласын деп тилеймен Аллагьдан ﷻ.
Рамазан айны лап арив кюйде оьтгермеге Яратгъаныбыз кёмек этсин бизге. Яхшылыкъны, языкъсынывну ва сюювню бу айы бизин ругь тазаланывубузгъа, юреклени парахат этивюне ва яхшы амалланы артдырывгъа болушлукъ этсин.
Ораза гюнлени Есибизге ибадат эте туруп йибермеге Яратгъаныбыз кёмек этсин, яхшы амаллар ва дуалар ругь ва къаркъара янгыртывгъа, ватаныбыз чечекленивге элтеген болсун. Амин!»
