Сигьручулукъ – авур гюнагь
Сигьручулукъ – авур гюнагь
Гьалиги заманда пал салагъан, халмаж булан байлавлу, гележекни билеген сигьручулагъа адамлар кёп барагъан болгъаны белгили. Биревлер тангала не болажакъны билмеге сюе, амма башгъалар буса, эркъатынны айырмакъ ва адамлагъа зарал этмек учун айлана. Сигьручуланы мурады бир – болгъан чакъы кёп къазанмакъ.
Мугьаммат Пайхаммар ﷺ шо гьакъда булай айтгъан: «Аллагьдан ﷻ къайры яшырылгъанны бирев де билмей» (ат-Табарани). Расулуллагь ﷺ айтгъан шо сёзлени унутмайыкъ ва адамлардан не болажакъны билмек учун кёмек излемейик. Яхшылыкъны орнунда олардан бизге къайгъы ва дерт къопмагъа бола. Яшавда масъалалар тувмай болмай, тек шоланы чечмек учун сигьручулардан ёл излемеге тарыкъ тюгюл. Олагъа баргъанча инг башлап шо уллу гюнагь экенни эсде сакъламагъа тарыкъ. Гьатта имандан чыгъармагъа болардай шонча да уллу гюнагь. Гюнагьгъа ва имансызлыкъгъа гелтиреген ёл енгиллик бермеге боламы дагъы? Ойлашып къарагъыз. Пайхаммар ﷺ сигьручуланы гьакъында айтгъан бу гьадисни кёплер эшитгендир, буса да бирдагъы керен эсге салайым: «Ким палчыгъа ва сигьручугъа гелип, ол айтгъангъа инангъан буса, ол Мугьамматгъа ﷺ йиберилгенге инамсызлыкъ гёрсетген бола» (Агьмат).
Расулуллагь ﷺ бизге уьйретген кюйде, яхшылыкъ да, яманлыкъ да янгыз бир Аллагьны ﷻ пурманы булан бола ва Ондан къайры дагъы бирев де бизин къайгъыбызны, масъалабызны чечмеге болмас. Гележекни билмеге барагъанлар шонда сигьручу жинлерден гелеген «маълуматланы» гёре ва айтылагъан негер де инана. Жинлеге тутулгъан адам буса Аллагьны ﷻ берекетинден йыракъ ва бютюнлей жинлени таъсирини тюбюнде. Нечакъы сюймесек де, гьалиги девюрде кёплеге гёз тиеген болгъан, сигьруну яманлыгъы да тие. Шолайлыкъны юрютегенлер бу дюньяда да, ахыратда да Есибизни рагьмулугъун гёрмес, Аллагь ﷻ сакъласын шондан. Али ибн Абу Талиб етишдирген кюйде, Пайхаммар ﷺ булай айтгъан болгъан: «Уьчев женнетге гирмес: эсиртеген ички даим ичеген адам, къардаш аралыкъланы уьзегенлер ва сигьручулагъа инанагъанлар» (Агьмат). Къыйынлы гьалгъа да тарып, уьстевюне сигьручу батманлыкъгъа тюшгенлеге не этмеге герек, нечик къутулма бола шо балагьдан?
Гёз тийгенде, пал салгъанда яда сигьру этилгенде охулагъан Къуръан аятлар бар. Сигьруну яманлыгъы тийген адам тыш якъдан таза йимик, ичинден де таза болмакъ учун къаст къылма тарыкъ. Ол ойларын, юрегин тазалыкъда сакъламакъ учун Есибизге умут этмеге ва Яратгъаныбыздан кёмек гёзлемеге тийишли. Шо ёлда болгъан чакъы кёп Къуръан охумагъа, ибадатгъа берилмеге ва яхшы ишлер этмеге герек. Олай да, бу масъаланы теренден билеген касбучуланы янына барып, Къуръанны кёмеги булан сав этегенлерден пайдаланма ери болур. Шо алимлер хас аятлар охуп ва бир-бир оьзге ишлери булан жинлеге тутулгъан яда сигьру этилгенлеге пайда гелтирмеге бола, Аллагьны ﷻ кёмеги булан. Есибиз Аллагьдан ﷻ тилейбиз бу гюнагьны уллулугъун сезмеге ва шондан сакъланмагъа. Яратгъаныбыз гюч ва къуват берсин гьар-тюрлю яманлыкъгъа къаршы турмагъа ва терс ёлгъа тюшюп къалардан сакъланмагъа. Амин!
МАГЬАММАТ АЗИМОВ
