Заманны зая этмейик
Заманны зая этмейик
Яшавубузда интернет ажайып уллу ер тутагъан болгъан. Биревлер герти яшавдан къачып, гьатта шону ичине сингип къалгъан. Башгъалар буса, соцсетлерде гёрсетилеген яшавгъа гёзю къарай, байлыгъына сукълана, шолар йимик болмагъа умут эте.
Адамлар башгъаланы яшавуна къарап бозара, олагъа ошап, парахат яшавлукъ этмеге сюе. Биревлер яшавун нече де арив этип гёрсетме бажара чы. Амма гьакъыкъатда оланы турушу шонча да тетиксизми экен? Динибиз гюллемей яшама уьйрете. Шо саялы бизден артыкъ яшайгъанлагъа тюгюл, осал яшайгъанлагъа къарама тарыкъбыз. Азмы амалсыз яшайгъанлар? Шолай этмеге болсакъ, Есибизге шюкюрлюк этербиз, пакъырлагъа буса, языкъсынавлу боларбыз. Биз чи дюньядагъы хыйлы инсандан къолай яшайбыз. Муна шогъар агьамият бермеге герекбиз. Башгъаланы тюзелген, арив гёрюнюшлю, багъыйлы яшавуна алданма тарыкъ тюгюл. Олагъа йимик, Яратгъаныбыз бизге де хыйлы яхшылыкъ берген. Айлана якъда бизин сюегенлер азмы? Гюллемекни орнунда, бугюн не яхшылыкъ этмеге боламан, ювукъ адамларымны нечик сююндюрейим деп ойлашсакъ къолайдыр.
Инаныгъыз, арив гёрюнюш ва багъыйлы гьисапланагъан яшав гьакъыкъатда башгъачалай болуп чыкъма ярай. Ким биле бай яшай буса да, ол адамлар сюювсюз, умутсуз оьмюр сюредир яда бир къыйынлыгъы бардыр. Шо саялы мунаман деп гёрсетилип турагъан яхшылыкълагъа алданмайыкъ. Шону орнунда уллулардан терен гьакъылгъа уьйренейик, ата-ананы сююндюрейик, жамиятгъа пайда гелтирейик. Агьлюдегилер сююнеген кюйде ожакъда исси гьал болдурма къарайыкъ. Ювукъ адамларыбызны гёнгюн алсакъ, олагъа агьамият берсек, яшавну татуву билинер. Оьзюбюзню яхшы этмеге къаст къылайыкъ. Китап охусакъ, кепибиз гелегенни этсек, яшав къужурлу болмасмы дагъы? Гьар гюнюбюзню пайдалы ишлер булан толтурма къарайыкълар. Оьзюбюзге ва айлана якъдагъылагъа яхшылыкъ этмеге болсакъ, инсанланы кепин алмагъа гьаракат этсек, яшав нечакъы арив болар!
Гьар инсан оьзгелерден къалышына ва башгъалагъа ошамагъа къарамакъ бош зат. Шону орнунда гьар ким оьз гьайын эте туруп, къылыкъ якъдан оьсювню ёлуна тюшсе, къолай болмасмы дагъы? Яшав бек тамаша иш! Биз гёзлерибиз гёрегенге инанып къалабыз, тек яшавну яшыртгъын янлары бола. Пелен адамны яшаву арив болуп гёрюне буса да, гьакъыкъатда ол янгыз яшайгъан, жаны парахатлыкъны сагъынагъан болмакъ бар. Ону ич яшаву оьзгелеге гёрюнмей чи.
Гюллемек пайда гелтирмей, некъадар, инсанны гьалын битдирсе тюгюл. Гьар адам айлана якъгъа сутур гёзюн къаратмай, ич гьалын яхшылашдырмакъны гьайында болса лап яхшыдыр. Гьаракат этип йиберсек, пагьмуларыбыз арагъа чыкъмакъ бар. Оьзгелеге ошама къарагъанча, оьзтеречилигибизни артдырсакъ къолайдыр. Яшавубуз толу ва маъналы болгъан сонг, башгъалар яшайгъан кюйге къарамакъ агьамиятын тас этер. Оьз яшавубуз бизге агьамиятлы болса, сонг башгъалар не этегени бизге авара да болмас. Яшав бир керен бериле, шо саялы башгъалар яшайгъан кюйге къарап, гюллеп, заман зая этгенче, оьз гьайыбызны этсек шайлы артыкъ!
