Юрек оьктем болмакъдан Аллагь ﷻ сакъласын
Юрек оьктем болмакъдан Аллагь ﷻ сакъласын
Ассаламу алейкум, аявлу охувчулар. Уьюгюзге яхшылыкъ болсун. Бир-биревлер оьктемлик деген сёзню маънасын толу кюйде англамайгъангъа ва бу масъалагъа герек чакъы агьамият бермейгенге ошай. Амма бу ажайып ишге уьстденсув, мен чи простой адамман, шолай эрши ишден арекмен, деп къол силлемесе яхшы. Барыбызда да бу аврув табылмакъ бар. Оьзгелерден оьзюн артыкъ гёрмек, къалгъанланы сан этмейгенлик уллу гюнагь, бек яман натижагъа гелтиреген ёл. Иманлы инсанлар шону бек яхшы англай, оьктем болмакъдан къоркъа.
Динибиз булайлыкъны бек айыплай, шондан сакъ болмагъа чакъыра. Белгили йимик, юрекде бюртюк чакъы оьктемлиги бар адам женнетге гирмес. Оьктемлик дегенде гьакъыкъатны къабул этмейгенлик ва инсанланы оьзюнден кем санайгъанлыкъ бола. Аллагь ﷻ сакъласын шолай болмакъдан. Бек къоркъунчлу билдирив! Гьар ким учун ойлашма зат бар. Гьалыбызгъа тергев берип, менде шо бармы экен деп ойлашма тарыкъбыздыр. Озокъда, болмаса яхшы, тек шеклик бар буса, агьамият бермеге ва герекли чаралар гёрмеге тарыкъ болажакъ.
Гьакъыкъатны къабул этмейгенлер арабызда ёкъдур, шонча да бузукъ тюгюлдюр гьалыбыз, тек юреги уллу, адамланы сан этмей хохайып юрюйгенлер чи бардыр нечакъы да. Муна булай адамлар (шоланы арасындан оьзюмню де тайдырма ихтиярым ёкъ) яхшы кюйде ойлашма, ич гьалына бакъма тарыкъ. Бизде шо бар буса ва билмей жаныбызгъа къабунма болгъан буса, бу юрек аврувдан арчылма тарыкъ болажакъ.
Инсанны тез алданып къалагъан хасияты бар. Бираз мадарлы болса, къуллугъунда гётерилсе, гьаким деп саналагъан болса, адам аста-аста алышынмагъа бола. Оьзюм этгенмен, къыйыным булан къазангъанман, мен шогъар лайыкълыман деген ойлар адашдырып къоя. Гьакъыкъатда бары да бар-барлыгъыбыз, малыбыз, ишибиз Есибиз берген ниъматлар. Биз оьзюбюз бир зат да этме болмайбыз, зайып къулларбыз. Яратгъаныбыз берсе – бола, бермесе – болмай. Башгъача болагъан иш тюгюл. Шо саялы негер оьктем болабыз? Биз чи топуракъдан яралгъанбыз, ахырыбыз да топуракъгъа айланажакъ. Къул деп оьзюбюзню къабул этмекден къолай иш болмас. Разилик билдиреген, шюкюрлюк этеген къул, Есибизге таби болгъанлардан. Ондан къайры, кекелин гётермейген, къул экенин англайгъан ва гьалына шюкюрлюк этеген инсан Аллагьны ﷻ разилигин къазана, бар-барлыгъы арта, берекетли бола.
Барыбыз да билебиз чи буланы, яшыртгъын сырлар айтмадым. Заманда бир шо гьакъда ойлаша турсакъ, къырыйыбыздагъы адамлагъа юрюшюбюзге, гьалыбызгъа багьа берсин деп тилеп, тергев этсек, аз буса да, сакълыкъ артар деп эсиме геле. Сонг да, этме сюеген гиши кёп зат бажара ва ич гьалыны уьстюнде ишлеме башласа, яхшы болма гьаракат этсе, Аллагьны ﷻ кёмеги булан хыйлы уьстюнлюклеге етишмеге бола!
