Къылыкъланы яхшылашдырайыкъ
Къылыкъланы яхшылашдырайыкъ
Ассаламу алейкум, аявлу охувчулар. Уьюгюзге яхшылыкъ болсун. Юрекни сююнчю, гьашыгъыбыз Мугьаммат Пайхаммарыбызгъа ﷺ айрыча гьюрмет этмеге заман гелди. Расулуллагь ﷺ тувгъан раби-уль аввал ай булан къутлайман сизин.
Не заманда да айтылып гелеген кюйде, бу вакътини Пайхаммарны ﷺ яшав ёлун, этген ишлерин эсгерив булан къаршыламакъ лап яхшы болур. Ондан да артыкъ – Пайхаммарны ﷺ сюннетин жанландырмакъ, къылыгъыбызны яхшылашдырмакъ. Гьали эсиме гелтиремен, алда да шо гьакъда язгъан эдим ва яхшылыкъгъа абат этмеге оьзюмден башламагъа чакъыргъан эдим.
Энни ойлашып къарайым, оьтген вакътини ичинде не яхшылыкъгъа етишмеге болдум? Оьзюгюз де шо гьакъда ойлашмагъа боласыз. Инг башлап юрегим ачыкъ кюйде англагъан зат – Есибиз Аллагь ﷻ берген Ислам динибизни юрютмеге бирт де къыйын тюгюл, гьакъ бусурман болмагъа ким де бажарар. Мунда оьзюне авур этмеге тюшмей, орта ёл булан юрюсе таман: Яратгъаныбызны буйрукъларын кютюп, гери урулагъандан сакъланса бола. Айтагъанда йимик этме де тынч болгъай эди деп ой гелмек бар, тек, ойлашып къараса, гертиден де, гьалал кюйде яшамакъ къыйынмы дагъы? Уллу гюнагьлардан сакълансакъ (гиччилерине тезокъда товба этип), адамлагъа зарал этмесек (яхшылыкъ этсек чи дагъы да яхшы) бола. Ибадат буса, бек тынч кютюлегени гьакъында айтдыкъ. Гёресиз, бажарылмайгъан, этмеге къыйын зат ёкъ.
Озокъда, гьар-ким учун да дин ёлда о-бу четим маъсалалар тувмай къалмай, шайтан ва напсыбыз иннемей турмай чы. Буса да, къатты кюйде гьалал ёлну сайлагъангъа бажарылмайгъан иш ёкъ. Алдыбызда Пайхаммарны ﷺ уьлгюсю де бар туруп. Муна мен де, аз буса да уьстюмдеги иш этивню юрютмеге къарайман. Бир-бир хасиятлардан къутулмагъа рагьатсыз бола, неге десе тарыкъ тюгюл затлагъа уьйренчикли болуп къалабыз чы.
Бары да якъдан буссагьат яхшы болуп къалмакъ къыйындыр ва бажарылмасдыр, тек бир-бир лап алданокъ ёкъ этилмеге тарыкълы мердешлерден къутулмагъа чы болабыз. Бир башлап не затдан къутулмакъ алдынлы экенни токъташдырмагъа тарыкъ (оьзюм этген кюйню айтаман), сонг шону уьстюнде гьар гюн ойлашмакъ ва гючюнге гёре шондан айрылмагъа тарыкъ.
Йылны узагъында, иштагь сёнюп къалмас учун, Пайхаммарны ﷺ, ону асгьабаларыны, алимлени яшавун ахтармакъ яхшы, олардан кёп затны уьйренебиз. Есибиз Аллагь ﷻ Оьзюне багъып абат этгенге багъып алгъасайгъангъа ажайып кюйде тюшюндюм. Гёз алгъа тутгъан яманлыгъымны тайдырмакъны (сизге шону ачыкъ этмейим) ёлунда, алдыма къаршы болгъан мисаллар ажайып зат! Яратгъаныбыз кёмек эте, башласакъ бола…
