Гишини малы бусурмангъа гьарам
Ассаламу алейкум, аявлу охувчулар. Уьюгюзге яхшылыкъ болсун. Яхшылыкъ адиллик булан байлавлу бола, намартлыкъ ва хыянатлыкъ буса, яшавну аччы этеген, бузагъан ишлерден.
Кёп айтылагъан масъаланы гьакъында бирдагъы керен эсге салма сюемен. Жамият топуракъгъа ес болув – уллу гюнагьлардан экени хыйлы айтыла, имамлар шо гьакъда билдире, насигьат эте. Амма намарт кюйде орамдан, хоншудан гесек ер юлкъгъанлар алгъанын гери къайтарагъаны гьис этилмей. Айтылагъан сёз оьзлеге тиймейгенде йимик сан да гёрмей къоя. Сонг орамда уьй этгенлер, барусун алгъа тебергенлер бу дюньядан гете, авлетлери буса, бир къарыш ерни де ерине гелтирмей. Хыянатлыкъ булан этилген шолай уьйлени, баруну бузгъанны ким буса да гёргенми? Бир керен этилген гюнагь иш бар кююнде къала. Терс ёлда еслик этилген малны къайтармакъны маънасын гёрмей. Амма бу дюнья булан битип къалмай чы яшав.
Биревлер къыпти, къызгъанч бола, гьар кепегин аявлап жыя, садагъа этмей байлыгъын артдыра. Олайланы къылыгъы осал буса да, гишини малына къол узатмакъ деген гюнагьдан сама сакъалана. Орамдан оьзюне топуракъ ялгъайгъанлар къызгъанч да дюр, бек эрши гюнагь иш де эте. Шолай болмакъдан Аллагь ﷻ сакъласын!
Гюнагьдан къоркъагъанлар, Аллагьны ﷻ буйрукъларына къаршы чыкъмас учун, шекли гьалда, гьатта оьзюню топурагъын берип де, жамиятгъа къошма рази. Иман осал буса, инсан терс ишлер этип къоягъаны белгили. Амма имангъа гелгенде, этилген яманлыкъны тюзлеме герек чи! Законсуз ёлда ес болгъан ер гесек инг башлап къайтарылма тарыкъ, сонг къалгъан ишлени гьайын этсе де ярай. Хоншуну бавундан къошуп алгъан бусанг – бир масъала, ол сени Аллагь ﷻ учун деп гечме бола. Орамдан яда жамиятны башгъа еринден алгъан заманда буса, масъала тынч чечилмес. Алынгъаны къайтарылмаса кюй ёкъ.
Сонг да, уллу байлыкъ болсун, метр узунлугъу булан топуракъ гесек болсун, шолар учун ахырат талайлыкъны алышдырмакъ гьакъыллымы дагъы? Дурус алыш-бериш тюгюл, утдурагъан ёл.
Гишини яда жамиятны малына еслик этмек зулму саналагъанны билесиздир. Шо гюнагь саялы, инсан бу дюньяда да такъсырын алмай оьлмежегин эшитгенсиздир. Герти дюньяда болажагъын айтмай къойгъанда... Ондан къайры, шолай гюнагь этген адам, нечакъы ибадат этсе де, ондан огъар пайда болармы экен?
Бусурман болгъан сонг, динибиз бу масъалагъа янашагъан кюйню биле туруп, алданайыкъмы дагъы? Топуракъдан бай болма сююп, шулай уллу гюнагьгъа тарымакъ ажайып гьайгевлюкдюр. Шону гюнагьы адам оьлген сонг да язылып тура чы ва Сорав алынагъан гюн этген шо иши саялы жавап берме огь не къыйын болажакъ.
Герти дюньяда талайлыкъ излейген инсан шолай ишден сакъланыр ва оьзю этген буса да, ата-бабалары этген буса, шону тюзлеме къарар деп эсиме геле.
