Аварагасул ﷺ гIумруялдаса цо-цо суалал
Аварагасул ﷺ лъималазулгун гьоркьоблъи кинаб букIараб?
Аварагасе ﷺ гIисинал лъимал цIакъ рокьулаан. Какилъ вукIаго как балел гIадамазул гIисинлъимал гIодулел рагIани, гьес как хехго тIубазабулаан. Гьес гIисинал лъимал реэдулаан. Гьезда убач гьабулаан ва кодоре рачунаан. Нухда лъимал дандчIвани, гьезие салам кьолаан.
Сапаралдаса яги гъазаваталдаса тIадвуссунаго, шагьаралъул рагIалда данде рачIарал асхIабзабазул лъимал гьес кодоре рачунаан ва цадахъ ругездаги амру гьабулаан гьел кодоре рачеян, цинги лъималазда гьоркьоб дагIба ккараб мехалъ, цояс абулаан жив Аллагьасул Расулас кодов ккуна, мунин абуни мугъалда ваччанин абун. Цогидасги абулаан жив Аллагьасул Расулас жинцаго кодов ккун вачанин, мунин абуни цогидасда вачеян амру гьабунин.
ЦIар лъезе бачIараб лъимер кодоб ккун букIаго кIущизе лъугьани, гьесул кIущ къотIизабичIого, кIущун вахъинегIан толаан гьес. «Муътаталда» АбутIалибил вас ЖагIфар чIвараб мехалъ, гьесул рокъовеги ун, свалатсалам лъеяв Аварагас гьесул гIисинлъимал кодоре рачун реэдана, гьезухъ балагьун гьезда гурхIун гьесул бадиса магIу чвахулеб букIана. Жиндирго вас, гьитIинаб лъимер Ибрагьим унтараб къоялъги гьев кодове вачун, гьесда гIемер гурхIулев вукIана хирияв Авараг ﷺ . Гьев хварав мехалъги свалат-салам лъеяв Аварагасул бадиса магIу чвахулеб букIана. Гьес ПатIиматил васал - ХIасанги ХIусенги каранде къалаан, гьел кодорги кколаан.
Нилъееги Авараг ﷺ мисаллъун вукIине ккола. Бугищ нилъер лъималаздехун Аварагасул гIадинаб гурхIелги, гьоркьоблъиги, гьелгун расандиги? БатичIони, пикру гьабизе ккараб бакI буго.
ХIАБИБ МУХIАММАДОВ
