Гуро гьев дие гьудул

Бадибе гьоцIо тIинкIун,
Гьодида цIалал кIутIун,
КIигьумерлъи гьабулев -
Гьев дие гьудул гуро.

Гьурмае хабар бицун,
Хвалиего рецц гьабун,
Рихьдае хьвадулесул
Хьибил дица кколаро.

Бергьарасда къвал балев,
Къурасде мал хьвагIулев,
Макирасулгун дица
Гьудуллъи гьабуларо.

Гьабулеб цо букIунев,
Бицунеб цоги бугев,
Царал гIамал бугесде
ГIагарде дун къаларо.

ГIадан хIакъир гьавулев,
ХIалихьалъи баччулев,
ХIамият бугесулгун
ХIал дица бикьуларо.

ХIакъалде данде чIун,
ДагIбадун гьедарулев,
Гьудулзаби гуккулев
Гуро гьев дие гьудул.

Бечедасе хIелулев,
ХIакимасе къулулев,
КъабихIаб гIамал бугев
ГIодосанго вокьичIо.

Биценалъулъ гьерсилав,
Гьабулелъулъ хIиллаяв,
ХIая бичун чед кунев
Чи дие гьудул гуро.

РагIуе хилиплъулев,
Харбие хисардулев,
Хияналъи гьабулев
Гьевги дий гьудул гуро.

Гьобол вокьуларевги
Гьудуллъун хIажат гьечIо,
ХIал бикьизе кIвахIалав
КIваричIо гьалмагълъунцин.

Руччабазе лъедолев,
Лъадуе мутIигIлъулев,
МахIидуясулгун дир
МахIцини рекъоларо.

Миллат цIунуларевги
ЦIаларо ракIалъ тIаде,
ЦIаруе хьвадулесде
ХьвагIун тола дица квер.

Гьереси-мацI рихарав,
РитIухъазе гьуинав,
Гьудуласе рухI кьолев,
РухIиязе ракI кьолев,

РагIуе чучуларев,
Чидае хIелуларев,
ХIилла-рекIкI жиндилъ гьечIев,
Гьев вуго дие гьудул.

САГIИД ОРДАШОВ ИЧИЧIАЛИ РОСУ