Къелдерил мугIрул

Ассаламу гIалайкум, къелдерил мугIрул,

Къимат тIадегIанаб инсулаб ватIан.

ГIурччинал рохьаз жиб сверун ккураб,

ХIажизабаз цIураб баркатаб ракь.

Гъваридал хъитIахъан чвахулел гIорал,

Гьаваги бацIцIадаб, лъимги цIорораб.

ГьитIинал-чIахIиял цIалдезе унел,

ЦIиял мадрасаби рагьараб ватIан.

Киналго данделъун зияраталде -

Сапаралъ хьвадулел, ниж, муридзаби.

Лъабил борхалъиян цIар жинда лъураб,

Хирияб мегIерги гьаниб бугелъул.

ЧIахIиял умумуз чуязда рекIун,

Зиярат гьабураб хирияб мегIер.

Бокьилаан дийги гьеб мегIералде,

Зиярат гьабизе цогIаги нухалъ.

Суайбат, Шамил район, Хьиндахъ росу