Мажгит - Аллагьасул рукъ

Аллагьасул рукъилан
Расуласго бицараб,
Цудунго вахъунесул
Сас жаниб къотIулареб. 

ТIалибинал ругьунаб,
Исламалъул нур бараб,
Бугебха цогиги рукъ
Мажгитилан цIар бугеб.

Жаниве вачIарасул
Малаиказ цIар хъвалеб,
Хирияв БетIергьанги
Гьелъие нугIлъун чIолев.

Найил тIала гIадинан
ГIамалазе гьарзаяб,
ГIадилал имамзабаз
Бусурбаби къачIалеб.

Мажгиталъ чи куцала
Амру-нагью гьабула,
Гьалаглъизе течIого
Чангияв хвасарлъула.

Мажгиталъул агьали
Къиямасеб къоялда,
ШафагIаталъ росулин
Вагьбудасан рехсана.

Ралъдалъ ччугIа кинигин
Мажгиталда вукIунев,
Муъминав инсанилан
Набиюназ бицана.

Мажгит тахIият гьабун
Аллагьасе как балеб,
Кири цIикIкIараб щвезе
Мажгит сабаблъун кколеб.

Мажгиталда адабгун
Аллагьасде вуссунев,
СахIихIаб сипаталда
Барзахалда вукIунев.

Мажгиталде зиярат
Зияратазул тIокIаб,
Аллагьу тагIалаяс
Гьелъий икрам гьабулеб.

Мажгиталде хьвадизе,
Зияратал гьаризе,
Гьарараб къабуллъизе
Къойилго жигар гьабе.

МУХIАММАДХIАБИБ КАЛАСОЕВИЧ