Аллагь, Мун гурхIаги рухI босулелъул
Аллагь, Мун гурхIаги рухI босулелъул
Ахирзаман щвейги загьирлъун бугин,
Аллагь, Мун гурхIаги рухI босулелъул.
ЛъикIалщиналги хун нахъе хутIарал
Хваразухъ урхъараб заман бугин гьаб.
Зулму-хIал бергьараб заманалъул рукъ,
Аллагь гурхIичIони, щибдай гьабила?
Рагъул-кьалул балагь тIасаги босун,
Умумузул ракIал рохизареги.
Росдал агьлуялда баракат лъеги,
РакIал рохун таги, рукъ роцIцIун таги.
Аллагь мун разияб гIамал гьабизе
Кьеги, БетIергьанас щивасе иман.
ТIолгоязул Халикъ, халкъалъул ПаччахI,
Мун цо вукIин лъала, хIелула Дуе.
РекIелъ иман бугез Аллагь ахIулин,
Аллагьги ХIабибги рекIелъги цIунун
ЦIоб гIатIидав Аллагь, гурхIи гьарула.
Ахирияб сагIат, ахираб хIухьел,
Аллагь, Мун гурхIаги рухI босулелъул.
Щивасул гьарурал лъикIал гIамалал
Пайдалъун ратаги ахираталда.
Дунял бахъаниги ахират кьеги,
Ахираталъул рукъ гвангъун батани,
Малаикзабазул кумекалдалъун
Алжан насибазда гьоркьоре ккаги.
Аллагь, Мун гурхIаги рухI босулелъул,
Иман босугеги, рухI босаниги.
Амин, Амин, Аллагь, Амин, я Аллагь,
Къабул гьабе Дуца, гьарараб гьари.
