Дуе нух битIаги, шагьру-Рамазан

Дуе нух битIаги, шагьру-Рамазан,

Аллагьасде муъмин гIагарлъулеб моцI.

ТIасияб соналъул Рамазан моцIги,

ТIаса чи камичIеб кье, Аллагь, нижей.

Нижер ккурал кIалал къабулги гьарун,

Рарал таравихIахъ кири цIикIкIаги.

ЦIалараб Къуръанги, бачараб зикру,

Ахираб рокъобги лъикIлъилъун хъвайги.

Гьарурал ифтарал, кьураб садакъа,

Хваразул рухIазе щолеблъун гьабе.

Радакь рахъун кванан, къаси кIал биххун,

Нусго соналъ нижей такрар гьабеги.

Хваразде гьабураб нижер зиярат,

Хабал агьлуялъе рохеллъун ккаги,

Унтаразе сахлъи, сахазе иман,

ГIадамазул ракIал цоцалъ жураги.

ГIидалъул къояца рахъарал сахIал,

Кафаратлъун гьаре, хирияв Аллагь.

ГIидалъул бараб как, гьабураб дугIа -

Алжаналъул нурлъун нижее гьабе.

КIалал къабул гьарун цоцахъе арал,

Баркиял къабуллъун рохизе гьаре.

Гьениб квараб нигIмат, кьураб садакъа,

Алжанул нигIматлъун гьабе нижее.

Ниж, загIипал лагъзал, кверал цере ккун,

Гьари дуде буго, хирияв Аллагь.

МахIшаралъул къоялъ ХIабиб-АхIмадгун,

Алжаналде унеб умматлъун гьаре.

СУЛАЙМАН МУХIАМАДНУРОВ