Мунго цIунизе цIакъ бахъе
Ахирзаман бугин бихьизе цебе,
Бицунеб харбида хадуб халгьабе.
Хварасухъ урхъараб бачlиндал заман,
Зикру гlемер бачун черх цlунун хьваде.
Хьандолеб гlамалги гlодобе рехе,
Гlунгутlаби рехсон мун гаргадуге.
Дурго жаваб кьезе кколеблъиги лъан
Лъикl бербалагьиялъ берцинго вукlа.
***
Гlадамазеги гьимун гьалдолеб керен бугел,
Бадиб цlа бугониги мацlалъ лъикlаб бицунел,
Бихьизе жо хутlичlел, гlолохъанго херлъарал,
Гlемерал чагlи руго гьаб ракьалда хьвадулел.
Дугlа нилъер ярагъин, дугlа даимго гьабе,
Гьаб дунял имтихlанин хlал хвезеги биччаге.
Берцинаб сабру гьабе, сабруялъул тlиналда
Тlогьилаб месед букlин кlоченеги биччаге.
***
Бокьарав инсанасул гlумру хисизабизе,
Гlемер замана барав, вукlин шартl гьечlо инсан.
Аллагьас кьураб гlакълу къойил хlалтlизабуни,
Бигьаго букlинарищ ракьалда дуй хьвадизе.
Дол гъалатlал камурав кинго чи вукlунаро,
Кинниги гьел рацlцlине цlодорав гlедегlула.
Гlумру къокъун батула, къалбу лъукъун батула,
Тавбуялде вуссиндал кумек гьабе, я Аллагь.
