Дир авар миллат
Дир авар миллат
Дир мугIрул улкадул аваразул халкъ,
Хирияб ракьалде рокьи бергьарал,
ГьитIинаб къавмалъул къуватаб гьаракь,
Кьурабалъгун мугIруз такрар гьабураб.
Гьаваялде рахун, тIавапги гьабун,
ТIалуда рещтIунел цIумазул бусен,
МугIрузул тIогьазда бутIрулги рорхун
ЧIухIадго хьвадулел чундузул ватIан.
Чармил гуллаялъул гудракь тIупичIел
ЧIухIарал гъалбацIал гьарураб улка,
Кинидухъ ахIараб эбелалъул кечI,
Кире ккананиги кIоченчIеб миллат.
Мун дир авар миллат, аваданаб халкъ,
Хунз, Гъуниб, ЦIумада - цIар арал васал,
ГIахьвахъ, Шамил район, ЦIунтIа, ЛъаратIа, -
Лъиего къуркьичIел къадруял мухъал.
Хьаргабигун, Гумбет, ЧIарада, Болъихъ, -
Бечедаб тарихалъ берцинлъараб ракь.
Казбек районалъул тIолго вилаят,
Вализабаз ккураб баракатаб бакI.
Ансадерил махщел - дунял хIайранаб,
ХIикматал накъищаз асир гьарураб.
Авар миллаталъул хIикматаб тIалъи,
ТIабигIат чIухIарал рухIиял лъалкIал.
Дун мукIурай йиго дур тарихалъе,
ТункIил гуллаялъулъ жиб мутIигIлъичIеб.
БегIерараб къалмил къуватаб калам
Киналго миллатал хIайранаб сарин.
ХIулидул щакъиялъ расеналги хъван,
Ирсалъе нахъ толеб дур маданият,
Мадиро кинигин цоцахье кьураб,
Кьурулъ хъала гIадаб дур адабият.
Авар миллаталъул бегIераб къалам,
Къадруялда ккурал дир къокъацоял.
Къуватав Шамилил эркенаб ВатIан
Асаразулъ толел хъвадарухъаби.
Биччанте берцинаб гьудуллъиялъул,
Гьоболъи къотIичIеб къисмат букIине.
Къварилъи-гIатIилъи ракIаз чучараб
Чилъидул гъанситухъ даим хинлъизе.
