ЛъикI щвараб хирияб моцI

ЛъикI щвараб хирияб моцI

Ассаламу гIалайкум, бачIун рещтIараб,

Баркула, хирияб Шагьру-Рамазан.

Мунагьал чурулеб, сахлъи цIунулеб,

ЦIилъараб батаги умматалъе мун.

Унтаби нахъчIвалеб, баркат бекьулеб,

Бекьараб хур гIадаб бачIин гьарзаяб,

БачIун бугин, вацал, нигIмат нилъехъе,

ГIамал гьабун бихье, бихьун течIого.

ЛъагIалида жаниб жиндир хиралъи,

Хира гьабун бугин бицен кIудияб.

Бицун хIалкIоларел хIадисал ругин,

ХIалае батулеб Шагьру-Рамазан.

Алжанал рагьулеб, жужахIал къалеб,

Къимат тIокIаб моцIрол, гьабе вац, адаб.

ГIолохъанлъи бугин гIумрудалъ бугеб,

ГIадада биччаге, диналъул вацал.

Дунялалъул рокъоб ригьнал талихI кьей,

Диналъул вацазул анищ бугебин.

Ахират къачIазе талихI бугезе

Къимат тIокIаб моцIрол, унго, хIалкIолъи.

Къечараб черхалъе, бакъараб чохьой,

Чанги напсалъул хIал бихьараб Шагьру.

Шагьидасе гIадаб кири цIикIкIараб

Даража бугебин, къуркьуге, вацал.

Аллагь гIемер рехсон, салават битIун,

Суннатал каказулъ кири гIемераб.

Кумек хIажатасе кири цIикIкIараб,

ГIолохъанаб заман, воре, биччаге.

Бичас кIодо гьабун жинда цIар лъураб,

Рамазан моцIалъул давла лъаларищ?

Диналъул вацазул ракIал цIилъизе,

ЦIилъараб батаги умматалъего.

ГIабид-хIажи, ГIочIлоб росу