Баркала, учительзаби

Гьале нижедеги тIаде къо щвана
ГIагараб школалъе къо-лъикI гьабизе,
ЦIияб гIумруялде гали бегьизе,
Нижеда малъараб ритIухъ гьабизе.

Ниж щибго лъаларел къабул гьаруна,
Къойилго нижеда дарсал малъана,
Рокъобги къватIибги гIадлу цIунизе,
ГIакълу нижер ботIролъ бижизабуна.

Бокьун буго нижей баркала кьезе,
ХIурмат тIадегIанал мугIалимазе,
Ниж - батIи-батIиял хасиятазул
Хира-кIодо гьарун цере рачарал.

БичIчIи букIинчIел, дарсазде кватIулел
Нижер гIайибазе гъулбасун чIарал.
ЧIиргъи-хъуй, ахIи-хIур нижер хIехьарал,
ХIал рекъезе гьабун рокьи бикьарал.

Нижеда кидаго кIочон теларо
ГIагараб школалда кьураб тарбия,
ГIаданлъигун намус кодоб цIунила,
Кибго цебехъанлъи тIалаб гьабила.

Жакъа школалъулгун къо-лъикI гьабидал
РекIелъе пашманлъи буго рещтIунеб,
Нахъа толеб бугеб лъимерлъиялъул,
Школалъулгун бухьен лъугIун ккеялъул.

Учительзабазе сахлъигун рохел,
Гьадин берцинго ниж нухда регIарал,
Киданиги нужер адаб теларо,
Аралъуса руссун нужехъе щвела.

КИЛАЛЪА НУЦАЛАЙ