Гьабищ доб замана…

Гьабищ доб замана, хириялщиназ
Ахирзаманилан жинда абулеб?
Гьабищ доб чIагояв инсанасдаса,
ГIарац хиралъараб согIаб замана?

Гьабищ доб дажалил наслабаздасан,
Пасалъи цIикIкIунеб, цIарал кIочонеб.
КIалалъ цояб бицун, ракIалъ инкар ккун,
ГIадамал хисулеб тохаб замана?

Гьабищ кереналда гIадамасул ракI,
Абураб рагIиялъ бида бецIцIулеб.
Лъезе цIар лъалареб тохал балагьаз,
ЦIер гIадин гIадамал холеб замана?

Гьабищ умумуца бицаде тараб,
Маххул чуял рекIун гIалам холеб мех?
Гьабищ дунялалъул цо рахъалдасан,
КIалъан чи вихьулеб хIикматаб заман?

Нахъа заманилан гIузру цIикIкIараб,
ГIаламатал тIатун ракIал хIинкъараб.
Берда цебе бугеб нигIмат гIемерлъун,
Чанги гIадамасул ракI биццалъараб.

Кинаб батаниги нилъ ругеб заман,
Жиндаса бечедаб дида лъаларо.
Нахъа заманалде нилъ ккей сабаблъун,
Тавбуялъе нуцIа нилъей рагьараб.

ПАТIИМАТ ГIАБДУЛАЕВА, УНСОКОЛО РОСУ