Гьанже бичӀчӀун буго дур къимат
Гьанже бичӀчӀун буго дур къимат
Гьале, дада, ана цогиги лъагӀел,
Мун аскӀов гьечӀого, мун вихьичӀого.
Дур гӀакълу гьечIого малъа-хъваялъе,
Дуда аскӀов чIезе дие щвечӀого.
ЦохӀониги гьечӀо дир гӀумрудул къо,
Мун ракӀалде щвечӀеб, пашманлъулареб.
Цо минут анищан аскӀов кӀусизе,
Ургъел бикьун дургун хабар гьабизе.
Гьанже бичӀчӀун буго дур къимат дида,
Мун гьечӀеб мехалда букӀунеб захӀмат.
Дуда гӀакълу дандбан, киндай гьабилин,
Дие кумекалъе гьикъа-бакъизе.
Гьаб жакъа къоялъги кӀочонев гьечIо,
ГьечӀин абулелда божуларо дун.
Рокъой вачӀунелъул ракӀалде ккола,
АскӀовеги вачӀун бикьилин ургъел.
Дир гӀумрудул хӀуби, гӀелмудал ралъад,
ГӀакълу дие кьолев къин гьечӀев магIдан.
Лъида аскӀове ун дица бицинеб,
Дие ишкал ккараб гӀумрудул суал?
Гьабе инсул хIурмат, щва гьесухъе нуж,
Хадуб инин абун бахъуге нахъе.
Метер щвараб мехалъ бухIун унин ракI,
Сонго инчIин абун пашманлъула мун.
Щибаб сагIат гьевгун - къимат тIокIаб мех,
Щибаб рагIи гьесул - хирияб жавгьар.
Щибаб гьими гьесул - рекIел тIегь буго,
ТIокIа гьеб кьолев чи нилъей щоларев.
