Пири гIадин ана лъеберабго къо
Рамазан моцIалъул хириял къоял
ТIаса унел руго пашман нилъги тун.
ГIибадат гьабулез давла босулеб,
ГьитIинаб гIамалги кIодо гьабулеб.
Цо гьабураб гIамал анкьнусилъ кьабун
Суннаталъухъ кири парзлъунги щолеб.
ГIакълу бугев чияс тохго толареб,
Давла бокьарасги жигар бахъулеб.
Сон гIадин бачIана, метер лъугIила,
Пири гIадин ана лъеберабго къо.
Балагье борчIараб кIудияб давла,
Мукъсанаб, хIалакъаб гIамалги гьабун.
Гьанже гурхIагиха нилъеда Аллагь,
НигIматазухъ щукру гьабизе лъачIел.
Кин жаваб гьабилеб, диваналъул къо,
Кьураб ресалдаса пайда босичIеб.
Лъица кьураб дуе божараб рагIи,
ТIасияб Рамазан духъе щвелилан.
Бихьея къотIи-къай дуца гьабураб,
Жеги лъагIел бугин нахъе хутIараб.
Гьабе дуего суд, нафсалъул хIисаб,
Кире арал кьурал лъеберго сордо.
Тагьажудал разе, дугIа гьабизе,
Къуръаналъул нуралъ гвангъизаризе.
Дир хириял вацал, диналъул яцал,
Аллагьас гIадада ккун ратугеги.
Щивасул гIамалал къабул гьареги,
Къиямасеб къоялъ нахъги чIвагеги.
МагIу тIолеб буго кIиябго бералъ,
РакI буго гIодулеб араб моцIалъухъ.
ХIелун, кверал рорхун гьарулеб буго,
ГурхIа, Аллагь, дида, Мун тIаса лъугьа.
