Тамашаяб заман

Тамашаяб заман

Гьаб цӀигӀуцӀиялъул цӀияб гӀумругун
ЦӀар лъезе лъалареб бачӀана заман.
Заралал гӀемераб, гӀадлу биххараб,
ГӀадан учузлъараб, чилъи тӀагӀараб.

Чангиял чиназе час ккун хьвадулеб,
ЧитӀир гьабун гьезда сверун сентӀолеб.
Сахалщинал рищун ракьулъ тӀупараб,
Ракьалда хутӀарал халват ккун чӀараб.

Хвалил къимат хвараб, хвелалъ къор гъураб,
Къваридал камияз керен унтараб.
Каранда накӀкӀ тӀупун тӀелхал риччараб,
ТӀолабго гӀумруго гӀаксалда ккараб.

ТӀабигӀаталъгицин гӀамал хисараб,
ГӀумру ццидаллъараб, ццин гӀедегӀараб.
Цоял зигаразда, цоял залазда,
Заманалъул гӀайиб гӀиллалъун ккараб.

Гьаб хиса-басидул чурулъе ккараб,
Чара тӀагӀиналде тӀадежоялъе,
ТӀолабго дуниял данде чӀаниги,
Дару батулареб унти тӀатараб.

Огь, тамашалъи гьаб заманаялъул,
Зиярат гьукъараб, тазият къараб.
ТалихӀ къосун къисмат къотӀуде ккарал,
Къокъид тӀоритӀулеб тӀаса-масаго.

ТӀолазго какулеб кепказул заман,
Кинаб цӀаргӀагидай цӀунун бугеб дуй?
ЦӀогьазе мукӀураб, цӀумазе кьогӀаб,
ЦӀар тарихалъ кьела дуй мустахӀикъаб.

САГIИД ОРДАШОВ, ИЧИЧIАЛИ РОСУ