ЦIуне, магIарулал, миллаталъул мацI

КъотIнор данде ккарал гIисинал лъимал,
ГIурус мацI бицунел рихьараб мехалъ,
Рахьдал мацI хвеялда хIинкъи бугеблъи,
ХIакълъун баянлъана, божилъи хутIун.

Инсанасул миллат батIа гьабулеб,
БутIадул аслулъун ккола рахьдал мацI.
Миллаталъул махIги, яхIги, намусги,
Надирлъун хутIула хвезе тани гьеб.

Хазиналъун нахъе умумуз тараб,
Ирсалъул бутIалъун батараб талихI.
БахIарчилъиялъул бицен бечедаб,
Биччаге кIочене кIвар гьечIого тун!

Эбелалъул рахьгун чорхолъ бессичIеб,
Чияр мацIалъ рекIей асар кьоларо.
Улбуца кинидахъ кучIдул ахIичIеб,
Куцан чиясул гьелъ камиллъуларо.

Жидерго мацIалъе хилиплъараб къавм,
Къисмат хиянатлъун хола гIадада,
Хадусел гIелазул таварихалъулъ,
ТалихIалъ мугъ бала миллаталдаго.

Малъе, магIарулал, лъималазда мацI,
Лъазе гьезда нилъер мугIрузул тарих!
Тоге мукъсанлъизе миллаталъул цIар,
Миллат билараца бичулин ВатIан!

Бице, магIарулал, миллаталъул мацI,
МугIрул иццул гIадаб чвахи бацIцIадаб!
Чиясул гIаданлъи, гIамал, берцинлъи,
Борцунеб роценлъун кколин рахьдал мацI!

САГIИД ОРДАШОВ, ИЧИЧIАЛИ РОСУ