ГIумрудул хIисаб
ГIумрудул хIисаб
Хабалалъ, рагIалда, гIодовги кIусун
ЦIакъ хIисаб гьабула унеб гIумрудул,
ГIадамазда лъурал ругъналги рикIкIун
КIаркьатIе тIинкIула тIоцебе магIу.
ТIурачIел анищал ракIалдеги щун
РакIбакъван лъугьуна, лъим батуларо.
Лъукъарал курмузе калам гьабизе
Гьанже аскIов кIусун чи ватуларо.
Чилъи чармил бугел бахIарзабазда
Бицун бахъиналде байтал ричIчIула,
РечIчIун нужедехун чIор дир батани,
ЧIорого теларо, рачIа аскIоре.
КIудияз абураб берцин гьабуни
Баракат щолеблъи щаклъи гьечIеб жо.
Щукру гьабунагIан нигIмат цIикIкIунин
ЦIалдолел чагIазда гIемер батула.
