Гьанже гIолел ясазе цодагьабго насихIат
Гьанже гIолел ясазе цодагьабго насихIат
Хур бекьи, боцIи хьихьи квер хьвагIун рехун тана,
КъватIал сверун бечелъи балагьулел руго ал.
Гьанже гIолел ясазе магIишат хIажат гьечIо,
Кодор айфоналги ккун хъвадарун бечелъула.
Пакъирал руго гьанже гIун рачIунел гьал васал,
Айфоназде ругьунал ясал квегъизе кколел.
РетIел-хьитни чурила, машинаби ругелъул,
Квен-тIех лъица гьабилеб, жий ячарав росасе?
Квен гьабизе кканани лъазе ккеларищ эбги,
Жеги росоний къулун ролъ буцичIей ай пакъир.
Яги ракъанщинахъе якьадалъухъеги ун
Гьелъ гьабураб квандейищ яхI гьечIеб квер бегьилеб?
Якьад аскIой гьечIони кафеял гьечIищ гьанже,
Ахирисеб копек кьун квенал заказ гьаризе.
Нагагь лъимер гьабуни гьебги хахулеб гьечIо,
Тукадаса росарал смесаз хьихьун ругелъул.
Смесал кьун хьихьарал лъимал унтулел руго,
Гьел сах гьаризе гIарац «Инсан» фондалъ кьеларищ.
Вай, гьечIеб гIакълу гьанже гIун рачIунел ясазда,
Улбуца кьечIеб гIакълу ясаз киса босилеб?
Гьеб гуреб багьа гьечIел, щибго бажаруларел,
Ясал кьола ригьнаде нужецаго малъеян.
Месед-гIарац, бриллиант, гьебги тIалаб гьабула,
Гьелъул цо граммалъул багьа гьечIел ясазе.
Жакъа хабар рагIула яс ригьнаде кьунилан,
МоцIидаса рагIула ригьин биххун бугилан.
Киназулго цого гIарз – квен-тIех, рацIцIалъиялъул,
Кинабгоги рехун тун, трубкабазде гьел руссин.
Вай, хIурматиял улбул, заман щвечIищ кантIизе,
Кинидаса нахъего кье ясазе тарбия.
Воре, мекъи бичIчIуге, хIурматиял руччаби,
Киназего гуребин хъвараб дица насихIат.
