ЛъикI щвараб

ЛъикI щвараб

ЛъикI щвараб рамазан моцI,

Аллагьас кьураб рахIмат.

Жиндилъ хиралъи бугеб,

Жиндилъ баракат бугеб.

Кинабго халкъул гIалам,

ГIибадаталда чIолеб.

Баркат-рахIмат гьарзаяб,

Нур бугеб рамазан моцI.

Киналгоги моцIазулъ

Хира гьабун бижараб.

Лъеберабго кIал кквезе

Бичас амру гьабураб.

ТIолго бусурбабазе

РахIманас сабру кьолеб.

Ракьалдаги зодибги

Нур чIараб рамазан моцI.

Жинда жаниб хирияб

Лайлатул къадри бугеб.

Берцинал гIамалазда

ГIадамал хьвадулеб моцI.

Къудратас гIаламалъе

ГIибадаталъе кьураб.

Садакъаби цIикIкIараб,

Берцинаб рамазан моцI.

ХIамзат ХIамзатов, Зивуриб росу.