Аллагьасе ﷻ гуреб гьабуге лагълъи

Инсан, дуе Аллагьас кьун бугебщинаб нигIмат,
Чохьое лагълъи гьабун тIувалевищ жакъа мун?
Къойил хIалхьудаги чIун, хъизан-лъималги кIочон,
ХIайван гIадин вукIине ихтияр лъица кьураб?
Балагьизе берал кьун, вилълъине хIатIал рижун,
ХIалтIизе кверал кьурав, Бичасе гьабе лагълъи.
КIалъазе дуй кьураб мацI, ботIрое кьураб гIакълу,
ГIаданлъи, адабги тун бегьилищ мун хьвадизе?
ТIалаб гьабе боцIи-мал хIалалаб нухдаса ун,
ХIилла-рекIкI гьабичIого, Аллагь ракIалдаги ккун.
Гьабуге дуца лагълъи тIад вугев хIакимасе,
ЗагIипав, хIал дагьавин къабихI гьавуге инсан.
РакI букIкIунеб каламгун кивго цеве вахъунге,
Хвезе вукIин кIочонге, Аллагь вугин валагьун.
Бечелъи, чин бугесе чIваге дуца накаби,
Чилъи чорхолъги цIунун гьабе Бичасе лагълъи.

Низамудин Гъазиев, ЦIолода Росу